Den nos postbus a cay un cantidad di documentonan, cu por mustra manera prueba, di cual ta sospecha cu Otmar Oduber, como Minister di Turismo, Transporte, Sector Primario y Cultura, bou unda ATA ta resorta, tabata meti den concierto cu a haya casi 1 miyon florin di sponsor di Aruba Tourism Authority.
Tin declaracionnan basta contundente, di cual e organisado di por lo menos un di e conciertonan mester a pasa un suma cuantioso na un fundacion specifico. Riba dje, a cay den nos mannan un cantidad di documento, conteniendo e-mail y copia di transaccionnan di banco na Venezuela, lista di pagonan di e concierto, cu ta comprometedor pa e mandatario y su amigo Ralph Maduro. Tin indicacion cu e mesun grupo aki ta financia e conciertonan y cobra bek cu interes for di e patrocinio di ATA.
Por ehempel, den e lista di gastonan di e organisacion, a paga dia 21 di september 2011 e suma di Afl. 13.425,= na Otmar Oduber y cu un tal “Jerusha” a busca e placa pe. E asunto ta bira mas interesante ora mira e acuerdo entre e organisado di e concierto y Ralph Maduro. E acuerdo ta parce cu a uza un señora como “front” di e evento, pero cu e mes no tin placa pa paga artista y di cual e ta cera un acuerdo di fiansa cu e mesun grupo aki y cu condicion cu tur asunto di printing y promocion ta pasa via companianan di Ralph Maduro. Tambe ta nota cu tur pago mester bay na un empleada di ATA y na un coordinador di Ministerio di Otmar Oduber e tempo aya. Parti di e ganashi di bar, cu mester a bay na un solo compania e tempo aya, tambe mester a bay na Ralph Maduro. Hasta a pidi pa no pag’e riba su compania, sino pa traha e check direct riba su nomber personal.
E pregunta grandi ta: Con por ta posibel cu e mandatario cu ta responsabel pa Aruba Tourism Authority, cu ta aproba e tipo di sponsorshipnan aki, sea directamente of indirectamente, ta asina envolvi den e organisacion di e evento tambe cu tur email e mester ta copia aden, cu e tambe ta haya placa di e evento y asina por sigui menciona. Esaki no ta conflicto di interes? Na cua fundacion a paga 250 mil florin despues cu ATA a pasa e suma di sponsorship di riba 900 mil florin? E preguntanan aki awor ta bou investigacion profundo na Husticia, pa evita cu placa ta sali “limpi” for di ATA pero ta bira bin bek di un forma of otro pa un grupo cu tin e propio Minister envolvi!
E hecho cu den tur e documentonan, Ralph Maduro sa precies ki dia ATA ta los e placa pa e organisacion, ta pidi pa page mesora y cu den e lista di debenan a paga e Minister tambe, ta motibo pa cuestiona. E documentonan ta den man di Ministerio Publico cu ta evalua si tin base pa un investigacion penal of no.
Hecho ta, manera Parlamentario Andin Bikker a bisa aña pasa tempo cu Minister Oduber a pidi un tereno, cu “Ora bo ta bende mangel bo no mag snoep”.
