24ora su cobertura internacional ta continua for di Miami, Pinecrest pa ta exacto for di e residencia di e consul general di Hulanda na Miami, sra. Lisette den Breems. Nos a keda invita pa ta parti di e celebracion di Dia di Rey.
Esaki a keda celebra un dia prome, riba diabierna 26 di april, unda cu diferente invitado relaciona cu Hulanda tabata presente, pero tambe representantenan di Aruba, Corsou y Sint Maarten y henter Reino Hulandes tabata representa akinan.
Nos a combersa cu e consul general pa asina conta nos un tiki di e idea tras di e celebracion aki y con importante e ta haya pa loke ta e union di Caribe Hulandes y Hulanda. “E ta realmente un celebracion di e hendenan, pa e hendenan,” segun Lisette den Breems a bisa durante un discurso.
E bunita parti ta cu no ta solamente di Hulanda unda ta celebra, pero den parti Caribense di Reino, y p’e consulado esaki ta un parti hopi importante segun den Breems. E tabata algo hopi leuk y un fiesta cu ta trece tur hende hunto, algo hopi importante no pa haci manera Hulanda pero manera Reino Hulandes. P’esey e consulado ta hopi contento di por a tin representantenan presente cu por a splica esaki detayadamente, for di Aruba, Corsou y Sint Maarten. “Esey tabata Dia di Rey na Miami,” den Breems ta expresa.
E ta bisa cu el a haya masha hopi reaccion positivo y di bishitantenan di otro partinan di mundo cu tabata presente. E reaccionnan tabata den su mayoria positivo segun e consulado anto e ta hopi contento di tur loke a bin den planificacion desde januari cu e mes a bishita Aruba den un programa fantastico.
“Tambe colaboracion cultural cu boso mes ta promove y con nos tambe ta contribui pa duna esaki un luga y pon’e den ‘spotlight’, mi ta pone hopi enfasis riba e colaboracion ey y sigur riba e area di turismo y maritimo, educacion y mas.”
Un multitud grandi di hende a disfruta di encuentro aki na Miami cual sigur lo sigui conoce mas interes mirando con mas y mas e culturanan di Caribe Hulandes ta keda haci su impacto rond mundo, specialmente pa esnan cu tambe ta bishita nos islanan tur aña cu un stimacion grandi pa nan.
