Keto bay ta topa cu mas dump ilegal y e biaha aki ta den e bario di Bushiri. E biaha aki a bin topa cu un dump ilegal cerca di e rotonde di Watty Vos. Un biaha mas ta hende mes ta crea e dumpnan ilegal.
A bin topa cu e dump ilegal aki, unda cu tin hopi sushedad tira. Aki a bin topa cu set di sofa tira eynan, incluso tin wasmashin como cantidad di hero n’e dump ilegal aki.
E cantidad di dump ilegal ta sigui y e biaha aki ta na Bushiri. Ta pidi p’e instancianan concerni pa presenta n’e sitio y tira un bista riba e dump aki. Tambe pa limpia e area. Ta pidi pa haci un limpiesa p’e bario di Bushiri. Pa por yega n’e dump aki, tin di baha na man drechi di caminda riba Watty Vos Boulevard, y n’e prome caminda di santo na man drechi unda ta haya e dump ilegal aki.
E dump ilegal aki no ta un bista bunita p’e vecindario. E dump aki ta trece cu ne bestia, pero tambe peliger pa hende como hole stinki. Simplemente e no ta un bista bunita. December ta eynan mes, p’esey ta pidi pa limpia e area aki.
Ni cuanto e instancianan concerni ta pidi y ta haci limpi, ta elimina e dumpnan ilegal, keto bay hende ta sigui tira nan sushedad rond. Tabatin e dump di Parkietenbos y e habitantenan tabata keha pa cer’e pa motibo cu nan no ta soporta mas e holo como bista.
A bin cu caminda pa hende hiba nan sushinan pa no laga nan tira rond di Aruba, pero hopi no kier haci esey. Kico mas mester haci pa stop esunnan cu ta crea e dumpnan ilegal.
