E Facultad di Ley di Universidad di Aruba a habri porta di Tienda di Ley atrobe. A haci esey dia 3 di october 2026. Tin fechanan cu e studiantenan di ley lo duna consulta.
Kico e Tienda di Ley ta haci?
E Tienda di Ley ta yuda personanan cu tin pregunta of problema legal y cu no tin suficiente recurso pa paga un experto legal. E ayudo ta consisti di un conseho skirbi of ayudo pa completa formularionan legal. E Tienda di Ley por duna conseho riba diferente tereno legal como labor, huur, daño, contractnan, areglonan di pago, divorcio, inmigracion y mas.
Si e Tienda di Ley no por yuda a causa di e complexidad di un problema of pregunta, e persona lo haya un indicacion pa acudi na un otro instancia concerni. E Tienda di Ley ta duna conseho so y no ta representa personanan den procedura legal.
Con e Tienda di Ley ta funciona?
Studiantenan dedica di e Facultad di Ley lo yuda personanan den e Tienda di Ley. Durante e cita, dos studiante lo scucha bo splicacion di e situacion of pregunta legal. Despues lo determina un strategia adecua pa bo caso cu yuda di un supervisor. Finalmente, bo lo ricibi bo conseho legal.
Con bo por registra bo consulta cerca Tienda di Ley?
Tienda di Ley lo tuma luga na Universidad di Aruba y lo ta habri riba e siguiente fechanan:
· 31 di october 2026
· 28 di november 2026
· 12 di december 2026
· 9 di januari 2027
· 13 di februari 2027
· 27 di februari 2027
· 13 di maart 2027
· 17 di april 2027
· 24 di april 2027
· 15 di mei 2027
Pa un consulta mester di un cita. Pa haci un cita bo por yena e formulario di inscripcion via e link aki https://docs.google.com/
9g/viewform?usp=sharing&ouid=110155040927726505293. E link aki pa e formulario ta tambe riba e pagina di Facebook di Tienda di Ley: ‘Tienda di Ley’ y riba e website di Universidad di Aruba, ua.aw.
