RBC Royal Bank Aruba a renoba su apoyo financiero na Barracudas Artistic Swimming Club pa di dos aña consecutivo, cu e meta di contribui na desaroyo di e atletanan y duna nan mas oportunidad pa competi internacionalmente y representa Aruba.
RBC Royal Bank Aruba N.V. a confirma su sponsorship pa Barracudas Artistic Swimming Club pa di dos aña consecutivo, reafirmando su compromiso cu deporte y desaroyo di hoben na Aruba. Pierre Rafini, vice-president di Commercial Banking pa Dutch Caribbean y Country Manager di RBC Royal Bank Aruba, a expresa su satisfaccion cu e partnership y e resultadonan cu e club a logra durante e ultimo añanan.
Segun Rafini, artistic swimming ta un deporte cu ta combina atletismo, gimnasta y baile den awa. E ta un disciplina exigente, pero ta ofrece oportunidad pa mucha muhe di diferente edad desaroya nan habilidad y gana experiencia. RBC ta orguyoso cu e club a participa den competencia internacional y a logra premio, mientras cu ta representa Aruba y su sponsor na nivel internacional.
Rafini a splica cu RBC ta apoya diferente iniciativa deportivo. Entre otro, e banco ta sponsor principal di Aruba Little League, un programa cu ta enfoca principalmente riba mucha homber, y di Aruba Chess Federation, cu ta ofrece oportunidad pa mucha y adulto participa den schaak. El a menciona tambe e apoyo reciente na beach tennis. Pa RBC, e diferente sponsorshipnan ta un manera pa inclui mas grupo den comunidad y promove participacion deportivo.
E representante di RBC a enfatisa cu deporte ta yuda mucha desaroya disciplina, siña competi di forma sano y crece como persona responsabel. E banco ta spera cu e colaboracion cu Barracudas por continua durante hopi aña mas.
Di parti di Barracudas, coach Devin de Veer a gradici RBC p’e apoyo financiero y e confiansa den e club. E a splica cu artistic swimming ta un deporte bunita, pero cu e base di atleta na Aruba ainda ta relativamente chikito. Esaki ta haci cu haya e recursonan financiero por ta un reto p’e club.
Cu e contribucion di RBC, e atletanan lo tin mas oportunidad pa sigui desaroya nan talento, participa den competencia na exterior y representa Aruba na un manera digno. De Veer a destaca cu cada donacion y partnership ta contribui na crecemento di e deportistanan y na futuro di e club.
Actualmente Barracudas tin alrededor di 40 atleta, cu edadnan desde seis aña te 33 aña. E deporte ta combina diferente disciplina, incluyendo landamento, gimnasta y baile, y ta demanda dedicacion y hopi tempo di e atletanan.
De Veer a confirma cu e colaboracion cu RBC tin aproximadamente un aña andando y a expresa su gradicimento na nomber di e famia di Barracudas. El a destaca cu e apoyo ta duna e club mas posibilidad pa sigui fortalece su programa y guia e atletanan den nan desaroyo deportivo.
