Na Rotterdam, durante FRED Expo, diferente organisacion di Aruba y Corsou a reuni pa comparti informacion tocante oportunidadnan di trabou, desaroyo profesional y posibilidad pa contribui na crecemento di e islanan. E evento ta brinda un espacio pa conecta talento di Caribe cu empresanan y institucionnan cu ta busca personal, mientras cu e ta stimula mas hende pa considera un regreso na nan isla.
Tristan Every, organisado di FRED, a splica cu e iniciativa a cuminsa na 2012, hunto cu su socio Quincy Santiago. E evento ta conoci como FRED, cu originalmente tabata antes Flinx Recruitment Expo Dutch Caribbean. Durante e añanan, e concepto a evoluciona y awor e nomber ta Future, Entrepreneurship, Recruitment, Dutch Caribbean.
E meta ta pa reuni hende y organisacionnan cu por comparti conocemento, crea contacto y habri porta p’e oportunidadnan nobo den e region.
Arubahuis y ATA ta duna informacion
Shandra John, representante di Arubahuis, a expresa satisfaccion cu e acogida cu e evento a ricibi. Segun John, tin hopi interes y e presencia di diferente participante ta brinda un oportunidad pa comparti informacion cu Arubianonan cu ta considera pa bolbe Aruba.
Aruba Tourism Authority (ATA) tambe tabata presente. Shadey Figaroa, representante di ATA, a splica cu e organisacion ta busca conecta cu Arubianonan na Hulanda cu tin interes pa bolbe y traha den sector turistico.
Ademas di informa tocante oportunidadnan di trabou den hoteleria y hospitality en general, ATA a comparti informacion di diferente website caminda interesado por busca vacaturanan. E intencion ta pa yuda e personanan haya un miho bista di e posibilidadnan laboral na Aruba y di e pasonan cu nan por tuma pa solicita un puesto.
IT4Curaçao ta conecta profesionalnan di tecnologia
Corsou tambe tabata representa na e evento. Milangelo Maduro, presidente di fundacion IT4Curaçao, a indica cu nan participacion ta enfoca riba conecta profesionalnan di tecnologia na Hulanda cu esnan na Corsou.
Segun Maduro, den e netwerk tin hende cu a bolbe e islanan, persona di e diaspora cu ta considera pa regresa, y profesionalnan cu kier sigui traha na Hulanda, pero cu ainda kier contribui na desaroyo di nan isla.
E fundacion ta facilita intercambio di conocemento, coaching, mentorship y oportunidad pa stage. E meta ta pa fortalece e sector di tecnologia y yuda e industrianan local crece.
Durante FRED Expo, IT4Curaçao tambe a organisa un panel tocante eHealth, e campo cu ta combina tecnologia cu salubridad. E panel a reuni diferente profesional, incluyendo un investigado cu grado di PhD di Aruba, un ciruhano cu ta traha na Erasmus y dos profesional den tecnologia, pa comparti diferente perspectiva tocante e uzo di tecnologia den cuido medico.
Maduro a indica cu e enfoke ta pa conecta conocemento tecnologico cu problema concreto cu e islanan ta enfrenta, pa asina busca solucionnan practico.
AAA ta buscando profesional den diferente area
Zunaica Phillips, representante di Aruba Airport Authority (AAA), a splica cu e desaroyo y expansion di Aeropuerto Internacional Reina Beatrix ta habri oportunidad pa mas vacatura den diferente area.
Segun Phillips, tin hende cu ta kere cu pa traha na aeropuerto nan mester tin estudio den aviacion, pero e posibilidadnan ta mucho mas amplio. Banda di e personal operacional, tin necesidad di profesionalnan den finansa, risk and compliance, recurso humano (HR), ingenieria mecanico y tecnologia di informacion (IT).
E representante a invita Arubianonan na Hulanda cu tin interes pa bolbe Aruba pa informa nan mes tocante e diferente oportunidadnan cu por surgi mientras e proyectonan di expansion di aeropuerto ta sigui desaroya.
FRED Expo ta reuni asina diferente organisacion y profesional cu tin un meta comun: fortalece e conexion entre talento di Caribe y oportunidadnan di desaroyo profesional, cu atencion special pa e personanan cu kier contribui na futuro di nan isla.
