Despues di mas cu 50 ora di e sucedido finalmente Ministerio Publico a saca un declaracion oficial, den cual ta informa cu a scucha e dos funcionarionan policial envolvi como sospechoso.
Nan ta bisa den e declaracion lo siguiente: Den oranan di mainta di diadomingo 9 di februari 2025 un tiroteo a tuma luga, caminda e homber hoben Ayden C. Lanoy di 19 aña di edad a wordo alcansa pa balanan policial, y a bin na fayece. Esaki a hiba na gran emocion y na hopi tristesa cerca su famia y den comunidad completo.
Den un investigacion penal manera esaki, den cual polisnan ta envolvi den incidentenan di violencia cu ta termina cu morto, practicamente semper ta tuma luga un investigacion independiente di Landsrecherche di Aruba. Landsrecherche ta un cuerpo investigativo cu ta neutral y cu ta independiente di Cuerpo Policial di Aruba. Mesora despues di e incidente fatal Landsrecherche a start un investigacion penal bao guia di fiscal di husticia. E polisnan envolvi a wordo scucha como sospechoso.
E investigacion ta andando aworaki y pa su duracion e polisnan envolvi a haya prohibicion di entrada den wardanan.
Ministerio Publico sa y ta consciente cu e tiroteo tin impacto grandi riba comunidad di Aruba. Pa e motibo aki, pa mas leu cu e investigacion ta permiti, Ministerio Publico lo percura pa informa regularmente tocante e investigacion y tocante adelantonan den e investigacion.”
Ya caba den oranan di merdia e plataforma mas grandi di Aruba 24ora.com a informa e decision tuma pa suspende e dos funcionarionan aki: Maurice Violenes y Righer Dirksz.
