Aruba Ports Authority (APA), Ministerio di Turismo y Floating Farm a firma un memorandum of understanding (MoU) pa hunto prepara un Business Plan y investiga e posibilidad pa establece un “drijvende boerderij” den Schoenerhaven na Oranjestad. E concepto ta combina produccion local di alimento, educacion y un atraccion turistico cu por contribui na revitalisacion di centro di ciudad.
E firma a tuma luga dialuna durante un bishita na Floating Farm den Merwehaven na Rotterdam, cerca di Schiedam. Minister di Turismo, Labor y Transporte, mr. Wendrick Cicilia, Marc Figaroa di APA y un representante di Floating Farm a formalisa e intencion pa explora e proyecto. E acuerdo ta un prome paso pa determina su viabilidad tecnico, financiero y operacional.
Minister Cicilia ta impresiona
Despues di un presentacion amplio, Cicilia a expresa entusiasmo pa e posibilidad di trece e concepto Aruba. Segun e minister, e combinacion di tecnologia moderno, produccion di alimento y un experiencia pa bishitante por representa un adicion importante pa e isla.
El a destaca particularmente e interes pa turismo di crucero. Un Floating Farm cerca di waf por ofrece pasaheronan un experiencia diferente y innovativo, mientras ta crea un conexion entre e waf y centro di Oranjestad. Pa Minister Cicilia, e idea ta cuadra cu e esfuersonan pa mehora infrastructura y espacio publico y crea mas actividad den ciudad.
E minister ta mira e iniciativa como algo mas cu un atraccion turistico. E relevancia social, e posibilidad pa educa y e contribucion potencial den siguridad alimenticio ta forma parti di e concepto cu e partidonan kier investiga.
Berdura educacion y producto di lechi
Peter van Wingerden, co-fundado y socio di Floating Farm, a bisa den un entrevista cu e ta mira un oportunidad atractivo pa Aruba. E interes di Aruba den produccion di cuminda saludabel, innovacion y ampliacion di su oferta turistico ta conecta cu e filosofia di e proyecto. “Mi ta kere cu e Floating Farm ta un adicion fantastico na e oferta turistico y tambe na haci e isla mas berde,” Van Wingerden a expresa.
El a splica cu e version pa Aruba por combina diferente actividad den un solo edificio riba awa. E ta pensa riba cultivo di diferente sorto di berdura, transformacion di cosecha den otro producto, manera te y actividad relaciona cu lechi y bestia. E composicion definitivo ainda mester sali for di e estudio factibilidad y e plan di negoshi.
Educacion lo tin un papel importante tambe. E intencion ta pa bishitantenan por conoce mas di produccion di alimento y cambio di clima, mientras nan ta mira con e sistemanan ta funciona den practica. Esaki por crea oportunidad pa alumno, residente y turista.
Rentabilidad como condicion
Riba e pregunta si un proyecto asina por ta rendabel na Aruba, Van Wingerden a contesta cu rentabilidad ta un punto di salida. Sostenibilidad tambe ta nifica genera entrada suficiente pa por reinverti den e edificio, sigui desaroya e concepto y inverti den hobennan y mas talento.
El a calcula cu, si e proyecto cuminsa, cu nan por entrega un Floating Farm dentro di aproximadamente un aña. Esey ta su estimacion y no un fecha di entrega acorda. E Business Plan ainda mester determina e alcance, inversion y condicionnan necesario pa realisa e iniciativa.
Van Wingerden a indica cu, den e escenario cu el a presenta, Aruba por bira cas di e di dos Floating Farm di nan concepto na mundo. E ta spera cu esaki por genera atencion di prensa internacional y publicidad adicional pa nos isla.
Un funcion nobo pa un waf historico
Schoenerhaven tin un conexion historico cu suministro di alimento. Antes, e barconan chikito di fruta tabata mara dilanti Markthallen y Royal Plaza Mall, treciendo producto fresco pa comunidad. Un cunucu flotante por duna un interpretacion moderno na e funcion ey, cu produccion local riba awa.
E prome na mundo
E experiencia di Rotterdam ta sirbi como punto di salida. Floating Farm a cuminsa opera na aña 2019 cu un concepto di produci alimento cerca di consumidor y reduci transporte y desperdicio. Su operacion original cu baca di lechi a pasa door di cambionan relaciona cu permiso y exigencianan tecnico. E lesnan ey tambe ta relevante pa e evaluacion di Aruba.
Peter van Wingerden ta impulsa e concepto hunto cu su casa Minke. Su rol ta enfoca principalmente riba desaroyo tecnico di e plataforma flotante y expansion internacional. E tin experiencia den industria y construccion na compania manera General Electric, Alstom y Hollandsche Beton Groep, actualmente parti di BAM.
Kico ta evalua
Pa Aruba, e siguiente paso ta traduci e entusiasmo den un plan concreto. Costo di energia y awa, calor, salpeter, condicionnan den waf, permiso y demanda pa producto y bishita lo mester forma parti di e evaluacion. E resultado di e Business Plan lo determina si Schoenerhaven por haya un funcion nobo cu ta combina alimento, educacion y turismo riba awa.
