Parlamentario mr. Xiomara Maduro (MEP) a dirigi un carta na Presidente di Parlamento, Alfred Sneek, solicitando claridad formal riba e alcance di e mocion di AVP y FUTURO pa investiga posibel iregularidadnan den gastonan publico durante aña 2020.
Maduro ta considera cu un investigacion independiente por contribui na transparencia y bon gobernacion. Sinembargo, e ta señala cu e texto oficial di e mocion no ta menciona su nomber, mientras cu den declaracionnan publico di Parlamentario Ruthlyn Lindor, Maduro a wordo menciona como ex Minister di Finansa.
Pa evita interpretacionnan diferente, Maduro ta solicita claridad riba cuater punto:
· E investigacion ta general of ta enfoca specificamente riba su responsabilidad como ex Minister di Finansa?
· E declaracionnan di Lindor ta representa su posicion personal of e posicion oficial di AVP y FUTURO?
· E investigacion lo inclui tur instancia y persona envolvi den programa FASE?
· Cualkier conclusion riba responsabilidad lo ta basa riba evidencia concreto y investigacion independiente?
Maduro ta señala cu e observacionnan di Algemene Rekenkamer riba FASE ta importante y merece evaluacion serio. Alabes, ta esencial pa distingui entre deficiencianan den un sistema y responsabilidad personal.
“Un investigacion independiente mester tin un mandato cla, considera tur e echonan y laga e evidencia determina e conclusion.”
Maduro ta solicita pa e aclaracionnan keda registra oficialmente na Parlamento, den interes di transparencia, imparcialidad y confiansa publico.
“E meta mester ta claridad y berdad. Esaki ta den interes di Parlamento, Gobierno y pueblo di Aruba.”
