Un trahado cu ta cumpli cu su responsabilidad henter siman mester tin e posibilidad pa cubri su necesidadnan basico y sostene su famia cu dignidad. Cu e enfoke aki, parlamentario y lider di fraccion di AVP, Jennifer Arends-Reyes, ta enfatisa cu mehoracion di poder di compra y lucha contra pobresa mester sigui ricibi prioridad den e agenda politico y social di Aruba.
E discusion tocante aumento di salario minimo y su relacion cu bestaansminimum ta toca directamente e siguridad financiero di trahadonan y nan famianan. Pa Arends-Reyes, mester atende e tema cu un trayectoria cla, dialogo y medidanan cu ta trece un mehoracion real den bida diario.
“Nos a papia hopi di e necesidad pa mehora calidad di bida di nos pueblo. E compromiso ey mester sigui guia nos trabou. Ora un hende ta traha henter siman y toch no por cubri su gastonan basico, nos tin un responsabilidad pa busca solucion,” e ta expresa.
Di salario minimo pa un entrada suficiente
Salario minimo ta e remuneracion minimo establece pa ley. Bestaansminimum, di otro banda, ta indica e suma cu un persona of famia tin mester pa cubri necesidadnan basico, dependiendo di e composicion di e hogar.
Pa Arends-Reyes, acerca salario minimo na e nivel necesario pa biba ta un paso importante pa brinda trahadonan mas siguridad y perspectiva. E introduccion di salario minimo pa ora na 1 di januari 2026 ta representa un paso den direccion di un remuneracion mas husto, pero e pregunta si entrada ta suficiente pa atende costo di bida ta sigui merece atencion.
E parlamentario ta señala cu e esfuerso aki ta cuadra cu e compromiso social cu AVP a expresa na diferente ocasion pa mehora poder di compra y atende e dificultadnan cu famianan ta enfrenta pa yega fin di luna.
“Tras di e cifranan tin un mama cu ta calcula cuanto ta resta pa cumpra cuminda, un tata cu ta preocupa pa paga huur y trahadonan cu ta haci nan maximo tur dia. Nan esfuerso mester traduci den un bida cu mas trankilidad y perspectiva,” Arends-Reyes ta destaca.
Un trayectoria responsabel cu meta cla
Arends-Reyes ta considera importante pa e proceso conta cu pasonan cla y dialogo cu sindicato y empresarionan. Den e cuadro aki, mester duna atencion na e capacidad di empresa chikito y e guia cu nan por tin mester durante e transicion.
Alabes, e ta enfatisa e necesidad pa evalua e efecto di aumentonan salarial riba prijsnan y empleo. E meta ta pa e mehoracion den salario resulta den mas poder di compra, pa trahadonan por sinti e beneficio den nan presupuesto familiar.
“Dialogo y responsabilidad ta necesario pa yega na un solucion cu ta funciona. Na mes momento, nos mester mantene e meta cla y sigui avansa. E necesidad di nos trahadonan ta real,” e ta afirma.
Siguimento den Parlamento
E parlamentario ta reafirma su compromiso pa sigui impulsa e tema den parlamento, cu atencion tanto pa entrada di trahadonan como pa costo di bida. P’e, e proposicion tocante bienestar mester haya siguimento den decisionnan y accionnan concreto.
“E puntonan cu nos a defende mester haya siguimento den nos trabou diario. Pa mi, progreso di Aruba mester wordo sinti den cas di nos famianan: den nan posibilidad pa cubri nan necesidadnan y construi un miho futuro,” Arends-Reyes ta conclui.
