Un dia yena di celebracion, progreso y orguyo na Scol Preparatorio Tarcicius den bario di Mabon. Minister di Educacion, mr. Gerlien Croes, a participa den e desvelo oficial di e logo nobo di e scol y inauguracion di un area di hunga completamente renoba, cu un inversion pa un dak adecua y structuranan recreacional pa e muchanan.
E inauguracion ta marca realisacion di un compromiso cu Minister Gerlien Croes a tuma durante su bishita na e scol aña pasa, ora a identifica e necesidad pa mehora e facilidadnan recreacional y particularmente pa provee un dak adecuado pa proteha e muchanan durante nan actividadnan diario.
E proyecto di inversion y instalacion di e dak y mehoracion di e area recreacional a wordo financia completamente door di Gobierno di Aruba, bou di responsabilidad di Ministerio di Educacion. Cu e inversion aki, Gobierno ta reafirma su compromiso pa mehora e condicionnan fisico di nos scolnan y crea ambientenan mas sano, confortabel y adecuado pa desaroyo di nos muchanan.
“Durante mi bishita na Scol Preparatorio Tarcicius aña pasa, nos a mira e necesidad pa mehora e espacio caminda nos muchanan ta hunga y desaroya. Na e momento ey nos a compromete pa busca e recursonan necesario y realisa e trabounan. Awe, cu hopi satisfaccion y orguyo, nos por mira e resultado di e compromiso aki. Pa mi, esaki ta e importancia di no solamente scucha e necesidadnan di nos scolnan, sino tambe transforma nan den accion concreto,” Minister Gerlien Croes a expresa.
Inversion den bienestar y desaroyo di nos muchanan
E area recreacional renoba ta brinda e muchanan un espacio mas adecuado pa hunga, move, socialisa y desaroya nan habilidadnan fisico y social. E dak ta contribui na un ambiente mas comfortabel y protegi, permitiendo cu e muchanan por disfruta di nan actividadnan recreacional den miho condicionnan.
Minister Gerlien Croes ta enfatisa cu inversion den infrastructura escolar no ta limita solamente na mehoracion di edificionan, sino cu ta directamente conecta cu calidad di educacion, bienestar y desaroyo integral di cada mucha.
“Un scol ta mucho mas cu un luga pa siña lesa y skirbi. E ta un ambiente caminda nos muchanan ta descubri nan talento, forma amistad, desaroya confianza y siña pa convivi cu otro. P’esey, cada mehoracion cu nos haci den nos scolnan ta un inversion directo den felicidad, bienestar y futuro di nos muchanan,” Minister Gerlien Croes a destaca.
Cooperacion cu partnernan pa un enseñansa moderno
Como parti di e celebracion, e scol a ricibi tambe borchinan digital nobo, entrega door di e partnernan ASTEC y APA, cu ta contribui na modernisacion di e ambiente educativo y ta crea mas posibilidad pa un proceso di siñamento interactivo.
E entrega aki ta complementa e inversion di Gobierno den infrastructura escolar y ta demostra e importancia di cooperacion entre Gobierno, sector priva y diferente partnernan pa sigui fortalece educacion na Aruba.
Minister Gerlien Croes a expresa su gradicimento na ASTEC y APA pa nan contribucion, y a destaca e balor di iniciativanan cu ta sostene e desaroyo educativo di nos muchanan.
“Ora Gobierno, nos scolnan y partnernan uni forsa, nos por logra mas pa nos muchanan. Cada aporte, sea den infrastructura, tecnologia of conocemento, ta contribui na un ambiente educativo cu ta brinda mas oportunidad pa siña y crece,” Minister Gerlien Croes a indica.
Compromiso cu mehoracion di nos scolnan
E inauguracion na Scol Preparatorio Tarcicius ta forma parti di e compromiso mas amplio di Ministerio di Educacion pa sigui identifica y atende necesidadnan di infrastructura den nos scolnan, teniendo cuenta cu siguridad, bienestar y calidad di e ambiente educativo.
Segun Minister Gerlien Croes, e prioridad ta pa sigui traha cu un acercamento practico y responsabel, caminda e necesidadnan identifica por wordo traduci den mehoracionnan concreto cu ta beneficia directamente nos muchanan y educadornan.
E minister a felicita directiva, educadornan, personal y alumnonan di Scol Preparatorio Tarcicius cu e desvelo di nan logo nobo y e inauguracion di nan facilidadnan recreacional, deseando nan un aña escolar yena di exito y oportunidadnan nobo.
“Awe nos ta celebra mucho mas cu un logo nobo, entrega di borchinan digital y un area di hunga renoba. Nos ta celebra progreso, cooperacion y un compromiso cu a bira realidad. Mi gradicimento ta bay na henter comunidad escolar di Tarcicius, na tur educador, partner y stakeholder cu diariamente ta contribui na formacion di nos muchanan.
Nos muchanan merece e miho condicionnan pa siña, hunga y desaroya. Y ta precisamente pa nan futuro cu nos ta sigui inverti y traha cu dedicacion. Pasobra ora nos inverti den nos scolnan, nos ta inverti den futuro di Aruba,” Minister Gerlien Croes a conclui.
