Durante un encuentro recien na Hulanda, Prome Minister mr. Mike Eman a presenta y entrega ehemplar di e buki “Volk van veerkracht – 40 jaar Land Aruba”. E ocasion a reuni personanan cu tin un relacion estrecho cu Aruba, cu a comparti nan recuerdo y reflexion riba e caminda cu nos pais a recori durante 40 aña di Status Aparte.
E publicacion, compila pa Rene Zwart y historiador y antropologo Luc Alofs, ta inclui contribucion di 35 representante di comunidad y academiconan, ademas di 15 recuerdo personal di Henny Eman, e prome minister-president di Aruba. E buki a sali anteriormente e aña aki; e encuentro na Hulanda a ofrece un oportunidad pa compartie cu diferente colaborador y cu relacionnan di Aruba.
Den su entrevista, Mike Eman a recorda cu Aruba a cuminsa su Status Aparte den circunstancianan economico sumamente dificil. Segun e mandatario, ceramento di Lago a laga desempleo di casi 35% y un caida di aproximadamente 50% den entrada di gobierno. Mientrastanto, Aruba mester a construi su propio institucionnan y introduci su moneda.
Eman a destaca e confianza di pueblo den e transicion. Segun su relato, den apenas cuater luna practicamente 95% di e florin Antiano a cambia pa florin Rubiano. P’e, esaki ta ilustra e determinacion di un pueblo cu a lucha pa autonomia y cu tabata dispuesto pa haci sacrificio pa sosten’e.
Minister Plenipotenciario mr. Mildred “Milly” Schwengle a recorda e mescla di emocion rond di 31 di december 1985: alegria pa Status Aparte, preocupacion pa e futuro economico y tristesa pa accidente di Betico Croes rond di fin di aña. Mirando e crecemento desde e tempo ey, el a enfatisa cu Aruba mester reconoce tanto su logronan como e retonan cu ainda ta enfrenta. Tambe e ta boga pa un relacion mas maduro y balansa cu Hulanda.
Ex-griffier di Eerste Kamer, Geert Jan Hamilton, a comparti su conexion cu Aruba desde 1989. El a recorda su participacion den preparacion di AZV, cu a drenta na vigor dia 1 di januari 2001. Pa Hamilton, e acceso di henter e poblacion na cuido medico ta un logro importante den construccion di Pais Aruba!
Ex-Minister di Defensa Hans Hillen a expresa su admiracion pa e dedicacion di Mike Eman na Aruba. El a destaca cu nan amistad a permitie conoce miho e preocupacionnan di pueblo y e esfuerzo pa fortalece e lasonan cu Hulanda y Cas Real.
Ex-vicepremier Laurens Jan Brinkhorst tambe a subraya e importancia di e relacion, enfatizando cu Hulanda mester reconoce Aruba como un pais autonomo den Reino, cu su propio identidad y ambicionnan.
E encuentro a pone e mensahe central di e buki den perspectiva: 40 aña di Status Aparte ta representa logro y perseverancia, pero tambe un responsabilidad continuo pa traduci e progreso di pais den un miho calidad di bida pa su pueblo.
