Sindicato di Polis Arubano (SPA) ta duna gobierno te dia 1 di november pa tin un protocol cu ta defini ken mester ta encarga cu e parti di transporte y atencion di pashentnan cu problema psikiatrico riba caya. Si no tin progreso p’e fecha aki, polis lo orienta hende cu ta pidi asistencia pa tuma contacto e crisisteam of Respaldo directamente, pasobra segun SPA, polis no tin e formacion necesario pa brinda e tipo di cuido.
Daniel Fernandes Perna, miembro di directiva di SPA, a splica cu den un reunion reciente cu Respaldo, e partinan a trata e puntonan di un convenio. Sinembargo, e ausencia di ImSan a stroba nan di finalisa e acuerdo tocante e transporte di pashentnan.
Segun Fernandes Perna, si no tin progreso pa 1 di november, polis lo cuminsa orienta hende cu ta pidi asistencia p’e casonan di crisis psikiatrico pa tuma contacto crisisteam of Respaldo directamente. E sindicato ta pidi pa cada instancia asumi su responsabilidad, pasobra polis no ta e servicio encarga cu atencion psikiatrico.
Falta di luz na warda di polis
Aparte di e problema di trata cu pashent cu problema psikiatrico, polis tin diferente otro situacion di preocupacion. Presidente di SPA, Lito Lacle, a expresa preocupacion tambe pa e falta di iluminacion na warda di polis na Noord, na Shaba. Segun dje, e luznan no ta traha, loke ta laga e area hopi scur durante anochi y ta dificulta e visibilidad di e agentenan.
Lacle a indica cu mando policial a manda un carta riba 9 di october tocante e preparacion di un orden di compra pa cambia e luznan. Pero e proceso ainda ta wardando aprobacion financiero.
E presidente di SPA ta cuestiona e tardansa y ta alerta cu e falta di iluminacion ta representa un riesgo pa siguridad di e agentenan, specialmente durante nan trabou den un contexto di e incidente- criminal y situacionnan cu ta involucra persona cu problema mental.
Pa mas lesa TREMPAN.COM.
