Proyecto Green Overseas di Union Europea a finalisa cu un plan concreto pa modernisa flota gubernamental, reduci dependencia di combustibel importa y contribui na transicion energetico di Aruba.
Minister di Finansa, Asunto Economico y Sector Primario, Geoffrey Wever, a presenta na Conseho di Minister e resultadonan final di e proyecto Green Overseas (GO) entre Gobierno di Aruba y Union Europeo hunto cu un proposicion pa inicia un transicion gradual di flota gubernamental pa vehiculonan electrico.
Cu esaki, un proceso di investigacion y cooperacion internacional cu a cuminsa na augustus 2025 a yega na un fase importante unda cu mester tuma decision. Gobierno awor tin un plan concreto pa modernisa su flota, reduci gastonan operacional y contribui na un futuro mas sostenibel pa Aruba.
E proyecto a wordo realisa cu un contribucion di €190,000 di Union Europeo, bou di coordinacion di Expertise France y cu asistencia tecnico di empresa Aleman Energynautics GmbH. Localmente, DEZHI a coordina e proyecto den colaboracion cu diferente instancia gubernamental, incluyendo DOW, CBS y ELMAR.
Durante e ultimo aña, expertonan a analiza e flota gubernamental, cu na inicio di e proyecto tabata consisti di aproximadamente 510 vehiculo bou di lease y 37 vehiculo den propiedad di Gobierno. Tambe a monitor seis vehiculo electrico y compara informacion di 80 vehiculo convencional pa evalua nan uzo, costo y eficiencia.
E investigacion a resulta den un plan di transicion, un proposicion pa modernisa e maneho di compra y lease di vehiculonan gubernamental, y un plan pa maneho responsabel di baterianan electrico.
Un di e obhetivonan principal di e iniciativa ta pa reduci dependencia di combustibel importa y e gastonan structural relaciona cu transporte gubernamental. E analisis a mustra cu vehiculonan electrico por spaar den gasto di energia y mantencion. Pa algun departamento cu ta uza nan vehiculonan intensivamente, e spaarmento potencial den costo total di propiedad por yega te na 15%.
E proyecto ta introduci tambe un manera mas eficiente di evalua inversionnan gubernamental, considerando no solamente e prijs di compra di un vehiculo, sino tur su gastonan durante su periodo di uzo.
“Nos kier un Gobierno cu ta opera mas eficiente y cu ta uza cada florin publico di manera responsabel. E proyecto aki ta permiti nos tuma decisionnan basa riba informacion tecnico y costo real, mientras nos ta reduci dependencia di combustibel importa y inverti den un futuro mas sostenibel,” Minister Wever a indica.
Basa riba e resultado di e investigacion, Energynautics a recomenda un transicion cu ta contempla electrificacion di 50% di flota gubernamental pa 2030.
Minister Wever a presenta na Conseho di Minister un proposicion pa establece un maneho di transicion gradual, cu ta permiti considera un porcentahe mas ambicioso, dependiendo di viabilidad tecnico, financiero y operacional. E proposicion ta contempla cu, na momento di renoba vehiculonan gubernamental, departamentonan mester considera preferiblemente compra of lease di vehiculonan electrico, tanten cu e tipo di nan trabou ta permiti esaki.
E implementacion lo rekeri coordinacion cu DOW y ELMAR pa sigura cu e infrastructura di carga y capacidad di red electrico ta prepara pa e transicion.
E iniciativa ta conecta directamente cu e Programa di Gobernacion AVP-FUTURO 2025–2028, particularmente cu e compromiso pa modernisa sector publico, aplica un maneho financiero mas eficiente y promove un transicion energetico sostenibel y inclusivo.
Banda di e beneficio financiero, electrificacion di flota gubernamental lo contribui na reduccion di emision di CO2, menos dependencia di combustibel fossiel y oportunidadnan economico nobo pa empresanan local den mobilidad electrico, infrastructura di carga y servicio tecnico.
E conseho ta contempla tambe un plan pa coleccion, reutilisacion y reciclahe responsabel di baterianan electrico, pa sigura cu e transicion ta tene cuenta cu su impacto ambiental riba termino largo.
Cu finalisacion di e investigacion y presentacion di e recomendacionnan na Conseho di Minister, Gobierno di Aruba ta prepara e siguiente fase: transforma e plan den un maneho concreto y un implementacion gradual.
“Transicion energetico no ta solamente un cuestion ambiental. E ta tambe un oportunidad pa modernisa Gobierno, reduci costo y fortalece nos economia. Cu e proyecto Green Overseas, nos a crea e base tecnico pa tuma e siguiente pasonan di manera responsabel y planifica,” Minister Wever a enfatisa.
Cu e iniciativa aki, Gobierno AVP-FUTURO ta sigui traha riba un aparato gubernamental mas eficiente, un maneho mas responsabel di recurso publico y un Aruba mas resiliente y sostenibel pa generacionnan di futuro.
