Diadomingo pa mas o menos 5:00 am a start un persecucion tras di un auto marca Toyota modelo Vitz debi cu e lo ta coriendo iresponsabel y sin luz patras. Como cu e auto no kier a para, a dicidi cu den Madiki Kavel a los mas di 10 tiro riba e auto, cu a alcansa e hoben na stuur y a mat’e al instante.
E dokter forensico di polis a presenta y constata morto di Ayden CJ Lanoy di apenas 19 aña di edad. Ta un hoben cu algun luna pasa a bira tata y como tal a bay laga un baby recien naci atras. El a atende SPO Brazil, ta bibando na Savaneta y ta trahando na Save a Lot na Boegoeroei. El a hasta participa na un festival di canto, no mucho tempo pasa, cantando un cancion composita pa Jeon.
Ayden a perde un ruman, dos aña pasa, tambe na un edad hopi hoben. Su amigonan ta sigura cu e ta un mucha homber keto, ta traha pa su salario y no ta problematico. Kico por a pasa diadomingo marduga ainda ta un misterio pasobra e mes no t’ey pa conta. Sinembargo, por lo menos un amigo tabata su tras y lo a graba e persecucion completo, cu lo mester por sirbi como material clave den soluciona e misterio y yuda Landsrecherche den ehecuta un investigacion neutral y husto pa ambos partido, tanto pa e polis como pa e victima.
Un parti esencial den e investigacion ta tambe cu, segun fuentenan den polis, cu na dado momento e Central di Polis a ordena e patruya pa stop e persecucion pasobra e ta mucho peligroso y sin e motibo asina pisa pa bal e risico. Parce cu e polisnan no a sigui e ordo ey y a continua cu e persecucion toch y finalmente a mata e hoben tras di stuur cu un of mas bala tira den su direccion.
Mester añadi cu Landsrecherche a presenta pa haci nan investigacion pa motibo cu ta trata di envolvimiento di dos agente policial. A kita nan arma reglamentario, pa cual de inmediato por traha paden so, mientras ta investiga si a uza e arma corecto of si tabatin abuso di poder of te hasta asesinato. Mirando e cantidad di huls cu tabatin benta na suela na e sitio, ta testigo cu ta un bashamento di bala tabatin, anto pa un chauffeur coriendo sin luz patras y cu no kier a para pa polis.
