Den e temporada aki di carnaval, nos no mester enfoca solamente riba gozo, alegria y tur cos positivo, mirando cu ta un di nos fiestanan di mas grandi cu nos ta celebra durante aña. Nos mester ta conciente tambe di e siguridad den trafico. Pa e motibo aki, Departamento di Salubridad Publico (DVG) ta enfoca e siman aki riba e tema di Siguridad den Trafico.
Jurette Croes, di e departamento di informacion y comunicacion, a splica durante un conferencia di prensa, cu hunto cu FADA, nan kier trece e concientisacion pa nos comunidad pa e temporada di fiesta aki.
Nos sa cu nos ta den temporada di carnaval, unda cu un di e factornan di riesgo den trafico ta alcohol. Hopi alcohol ta wordo consumi den e temporada aki y tur persona cu ta den actividad di carnaval, of na un actividad di carnaval, tin cu yega nan cas. Pa e motibo ey cu kier trece e alternativa na comunidad. E alternativa tey. Tin otro opcion. No mester core bao di influencia di alcohol, pero por asigna un persona pa hibabo bo cas safe. Cifranan cu departamento di Salud Publico tin riba e problematica di trafico ta indica cu pa aña, ongeveer 16 persona ta fayece den nos trafico. Di e 16 personanan aki, 75% ta hende homber y solamente 25% ta hende muhe.
Croes a sigui splica cu si pone esaki den cifra di hende, bo ta bisa cu 12 persona ta fayece cu ta hende homber pa aña y 4 solamente ta hende muhe. Loke ta resalta tambe, cu e edad mas afecta, ta e edad entre 15 y 24 aña. Esaki ta bisabo cu nos hobennan ta na peliger den nos trafico.
Mas cu claro e cifranan aki no ta directamente relaciona na alcohol. Tin otro factornan cu ta forma cierto risico, manera velocidad halto. E problematica ta grandi y hopi biaha e consecuencianan por ta lamentabel.
Ta pa e motibo ey ta encurasha comunidad den e temporada di carnaval aki pa papia cu e driver asigna, tin un amigo DiDi. Departamento di Salubridad Publico ta sostene e campaña di e Amigo Didi. Esaki ta un bon alternativa pa tur hende ta conciente si ta bay algun actividad di Carnaval, bo ta bay consumi bebida di alcohol, haci un afspraak entre famia y/of amistadnan, kende ta esun cu ta percura pa yega cas safe. Tur hende tin un famia cu ta warda riba dje pa yega cas safe.
Na momento cu haya un accidente, no semper bo ta fayece. Tin biaha bo ta keda cu deshabiliddnan y sa tambe cu e deshabilidadnan aki tambe ta pisa emocionalmente hopi fuerte riba e famia y tambe financieramente e ta pisa tambe riba no solamente famia, pero tambe riba nos sistema. Pesey pa e motibo aki e siman aki ta uni cu FADA, hunto cu Fundacion Zinnia pa trece concientisacion na comunidad riba Bo Amigo Didi.
