Diabierna prome cu merdia gay cora a canta na Burubundo, den area di Sabana Basora/Pos Chikito, unda c’un cas/warehouse a pega candela. Prome informe ta indica cu e candela a cuminsa cerca di e warehouse y debi na e gran cantidad di yerba seco, esaki a expande p’e mondi cerca y tambe e viviendanan cu ta keda den bisindario.
E prome unidad di bombero cu a yega n’e sitio a haya nan c’un situacion unda cu ademas di e warehouse, patras di dje tabatin un superficie basta grandi di puro mondi cu yerba seco tambe a coy candela.
E shop di carpinteria a kima por completo, den e candela aki. E propietarionan tin casi 30 aña biba na Aruba y ta prome biaha cu algo asina ta sosode cu nan. Señora di un di e propietarionan a hasta bira malo, te cu e paramediconan mester a dun’e atencion medico. Sigur un situacion basta fastioso p’e famia, cu mester a wak con nan propiedad tabata kima sin cu por a haci nada pa scap’e.
Algun testigo a hasta bisa di a wak un persona pasa cerca di e tayer di carpinteria, net prome cu e candela.
Te hasta bomberonan cu no ta na warda, a yega n’e sitio pa asina duna un man den caso cu ta necesario, pa por duna un man na nan coleganan.
Cuerpo di Bombero a haci un tremendo trabou, cu cuater unidad presente pa asina combati e candela aki, p’e no yega cerca di e casnan den cercania.