Dialuna anochi a tuma luga un encuentro pa tur cabesante di Centro di Cuido di Mucha na John F. Kennedy (JFK). E meta di e anochi aki tabata pa duna informacion relevante tocante e proceso y ehecucion di supervision den centro di cuido di mucha. DMH conhuntamente cu Cuerpo Policial Aruba, esta Polis di Bario y Scol di Polis, a uni forsa y a percura pa brinda informacion amplio riba loke ta e trayecto y implementacion di supervision den Centro di Cuido di Mucha, cu ta stipula pa cuminsa pronto den 2024.
Den un sala completamente yen, 41 centro di cuido di mucha, representa pa sea cabesante y/of trahador pedagogico tabatin e oportunidad pa por haci diferente pregunta, a base di e informacion brinda y asina nan tambe por ta na altura di loke por spera durante un supervision di e supervisor di DMH.
Supervision ta sumamente importante pa garantisa un desaroyo completo y sigur di mucha y tambe un bon cuido di mucha, e supervision adecua di e centronan di cuido di mucha ta esencial. Tanto e doñonan (propietario) di e centro di cuido di mucha y gobierno ta trahando duro pa aumenta e contribucion conhuntamente na e calidad di e centronan di cuido di mucha.
E doño (propietario) di e centro di cuido di mucha ta responsabel pa cumpli cu e rekisitonan di calidad, stipula den articulo 9 y 10 di e Ordenanza Nacional di Centro di Cuido di Mucha (Landsverordening Kinderopvang) (AB2017 No. 38), cu ta delinea y salvaguardia cuido di mucha na un manera responsabel. E rekisitonan di calidad ta aparece den e Ministeriele Regeling Handleiding Kwaliteitseisen Kinderopvang, cu ta disponibel riba website di DMH (www.dmh.aw).
E supervision lo tuma lugar den forma di observacion concreto, a base di un checklist di e supervisor, teniendo combersacion y dunando guia y sosten na e doño- y trahadonan. E supervisor tambe por repasa e documentonan necesario, como tambe tene bista riba e diseño (inrichting) y uzo di e tur e areanan, cu e muchanan ta uza den e centro. E supervision aki lo tuma luga minimo 1 biaha tur aña, sin aviso previo y tambe tin espacio pa tin supervision di continuacion.
CPA, den persona di Suzy Nadal, di Scol di Polis, a amplia mas riba loke ta e parti huridico y tambe e funcionamento di e autoridadnan di e supervisor. Nadal a elabora amplio riba e diferencia di delito (misdrijf) y infraccion (overtreding) y alabes a splica tocante ehecucion administrativo (bestuurlijke boete). DMH kier a gradici tur cabesante y/of trahado pedagogico presente, como tambe Nadal y Matos di KPA, Polis di Bario, pa nan presencia y presentacion.
