Casi 1:00 PM un descuido den trafico a causa un accidente entre un auto particular y un scooter di cual e ultimo aki su manehado a resulta herida. Segun por a compronde, e chauffeur di e Getz a sali pa subi caminda y no a mira e scooter pa cual el a bay dal den dje. E accidente a sosode net dilanti di IBISA, net na e T-weg di Frankrijkstraat y Italiestraat.
MFA-915 tabata bayendo Bushiri ora cu e Hyundai Getz a bin dal den dje. A tuma nota na e sitio cu tabatin diferente auto staciona banda di caminda, strobando visibilidad.
E homber manehando e scooter tabata grita di basta dolor y tabatin indicacion cu e lo mester a fractura su pia. Diferente persona a yuda pa bini cu un paña pa pone sombra pa e herido, mientras cu tabata en espera di yegada di ambulance. Solo tabata hopi cayente e momento ey.
