E agente policial Jonathan de Cuba a haya un condena awe for di hues den Corte. Sinembargo, door cu e condena ta condicional, probablemente esaki lo no afecta su trabou como polis.
De Cuba, kende no ta deteni, a presenta pa scucha kico e decision di corte lo ta. Hues a hay’e cupabel di a viola secrecía di trabou, pa cual el a abusa di su trabou como funcionario den servicio di Cuerpo Policial di Aruba.
E echo aki a tuma luga den e periodo di juli 2022, ora cu el a duna un persona, kende e conoce, informacion cu e homber aki riba su mes lo no por a haya.
Un di e argumentonan uza door di su abogado, mr. Peter Mohammed, pa absolve su cliente ta cu e victima no a entrega un keho contra e polis. Esaki ta motibo pa declara fiscal no admisibel den su demanda. Pero hues a rechasa e argumento aki.
El a splica cu den caso cu ta papia di un polis, no mester tin keho. Hues a bisa cu polis tin informacion confidencial di hende pa haci un trabao publico. Na opinion di hues, e echo cu e acusado aki a duna un conoci di dje informacion cu a wordo pidi na dje di un auto, ta un eror! El a duna e conoci di dje datonan cu ta pertenece na un number di auto, pues e nomber di e persona y e adres na unda e ta registra. Hues a bisa cu esaki ta violacion di secrecia di su trabou.
E echo cu e homber no a haci nada contra doño di e auto no ta hunga un rol den e caso aki. Pero si e echo kico por a pasa, pasobra e homber cu a pidi e datonan si tin un record policial.
Loke cu hues a tuma e acusado na malo ta cu el a daña e confiansa cu ciudadanonan mester tin den un polis, a daña imagen di polis den comunidad. Pa loke ta e castigo, a tene cuenta cu loke Hof normalmente ta duna den tipo di casonan asina. E tin un carchi castigo blanco. A impone 2 luna, pero condicional cu 2 aña di prueba. Tambe a impone 100 ora di trabou pa comunidad y si no haci esaki, 50 dia cera.
E acusado no a bisa nada si e ta acepta e castigo of no.
