Cu hopi entusiasmo Fundacion Go Cultura ta presentando un serie di encuentro exitoso y impactante desde luna di april pa artista, creativo, visionario, empresario cultural y creativo y tambe educadornan Arubano.
E exito rotundo di e sesionnan aki ta un prueba di e importancia inmenso di fomenta conexion util y di empodera nos comunidad creativo. Mas di shen individuo di e Industrianan Cultural y Creativo (CCIs) ya a atende e sesionnan transformado aki, impulsando un revolucion creativo vibrante riba e isla.
E sesionnan aki a resulta di ta esencial pa e avance di nos comunidad artistico. Na prome luga, nan ta provee un plataforma dinamico pa artista y creativo por bini hunto y comparti nan experiencia, idea y reto den e industria.
Na di dos luga, e encuentronan aki ta fomentando e creacion di relacionnan robusto y e rednan mas estrecho den e industria. E poder di aliansa y colaboracion ta birando cada bes mas evidente, ofreciendo beneficio inmenso na artista y creativo, como tambe e industrianan den nan totalidad. Hunto, nos por logra cosnan grandi.
Na di tres luga, e sesionnan aki ta resulta sumamente poderoso den e conscientisacion tocante e impacto profundo cu e industrianan aki tin riba comunidad en general. Uzando ehempel concreto di pais den region cu por demostra cu evidencia con nan a impulsa un desaroyo sostenibel impactante door di reconoce e balor di nan Industrianan Cultural y Creativo. Haciendo esaki, Go Cultura ta demostra e urgencia di formalisa y desaroya Aruba su Industrianan Cultural y Creativo. No solamente pa e sector, pero tambe pa desaroyo y bienestar di Aruba den su totalidad.
Sinembargo, e encuentronan aki tambe a trece na luz di dia varios reto cu artista y creativo den e industrianan aki ta confronta. A traves di un dialogo habri, por a identifica dificultad, frustracion y desapunto comun.
Remarcabel ta cu varios di e problemanan expresa door di e comunidad creativo ta keda resalta continuamente durante tur e encuentronan aki. Algun di nan ta: limitacion di fondo y accesibilidad na esaki pa ehecuta proyecto, necesidad pa adkiri mas conocemento of asistencia den mehora e forma con ta haci peticion pa fondo, acceso inadecuado na recurso y infrastructura, necesidad di incentivo pa stimula crecemento di e industrianan, derecho di propiedad intelectual y e necesidad crucial pa reconocemento, respet y sosten di gobierno y otro stakeholder.
No obstante esaki, memey di tur e retonan aki, Fundacion Go Cultura ta hopi entusiasma pa sinti e boluntad inmenso di artista y creativo pa colabora mas cu otro pa crea mehoracion pa e industria.
Tambe ta tumando accion pa como colectivo desaroya solucion innovativo y cuminsa crea strategia pa impulsa progreso y crecemento.
Go Cultura ta generando entusiasmo y sosten amplio door di expone e trabao y potencial remarcabel di nos artistanan y creativo, tambe door di destaca e beneficionan social y economico profundo cu e industrianan aki ta genera.
E mensahe cu ta resonando ta hopi cla: Na momento cu descubri y realisa e balor y potencial di Aruba su sectornan cultural y creativo y dicidi di inverti den nan, nos lo ta invertiendo den un futuro prospero.
Concluyendo, e encuentronan aki ta sirbi como catalisado vital pa desaroyo y crecemento di e Industrianan Cultural y Creativo di Aruba.
Door di activamente identifica e retonan, establece red solido y fomenta aliansa impactante, e sesionnan aki ta sigui construi e caminda pa un ecosistema vibrante cu ta berdaderamente sostene y apoya artista y creativo pa asina nan por prospera.
E encuentronan aki ta habri caminda pa e proximo iniciativa di Fundacion Go Cultura cu lo ta un investigacion profundo pa colecta data pa asina por demostra cu evidencia, e potencial real di Aruba su Industrianan Cultural y Creativo pa cu desaroyo economico, social y cultural.
Go Cultura ta invita e comunidad artistico y creativo di Aruba pa ban sigui atravesa un era transformado di imaginacion, innovacion y inspiracion y crea un futuro mas briyante hunto, caminda creatividad no tin barera.
