E acusado Alberto Pantophlet no tin solamente su famia pero tambe e hendenan di e bario di Isaak Wagemakerstraat na San Nicolas, hopi fada. Diahuebs e mester a presenta den Corte pa diferente caso di menasa y destruccion contra famia y bisiñanan. E mes no a presenta, pero hues a conden’e toch!
E homber aki tabatin cuater acusacion y no menos cu cuater abogado pa represent’e. Cada bes cu a deten’e pa un caso, tabatin otro abogado cu tabatin piket. Solamente tabata presente un ruman, pero e no por a representa un ruman di dje, doño di e cas unda a destrui un bentana, pasobra e no por a print e apoderacion cu el a haya apenas e anochi prome. “Sorry pero sin esey mi no por bay di acuerdo pa bo representa bo ruman. Ademas, no tin un documento cu ta mustra cu e ta doño di e cas tampoco,” asina hues a bisa e ruman homber di e acusado, kende ta un di e victimanan tambe di dje.
Prome ta acusa Pantophlet di a menasa un persona cu morto riba 18 di april 2022, door di bise: “No bisa mi nada! Mi ta bay mata bo awe!” y/of “Bo ta he hopi, mi ta bay dal bo”. 2) Ta acus’e di a menasa dos persona cu morto riba 31 di december 2021, door di saca cuchiu pa nan y bisa nan: “Mi lo sali den un par di dia y lo bin he boso tur”. Ta acus’e di a destrui bentana di cas di e personanan aki riba 31 di december 2021. Y por ultimo e tin e acusacion di un atraco dia 21 di october 2021, unda cu el a uza un cuchiu pa menasa su victima.
A entrega e citacion na e acusado y tabata sa cu lo trata e caso riba diahuebs ultimo. Loke por a compronde for di su ruman homber ta cu un dia prome nan tabata sa cu polis tabata busc’e pa caso di robo di un bicicleta. Pero si e ta deteni, e ruman no sa. Pues e no tabata presente pa hacie pregunta.
Fiscal a djis hiba palabra y a bisa cu pa e di dos acusacion cu el a menasa su ruman homber, a pidi pa declar’e liber. E motibo ta cu tin e denuncia pero recherchenan no a interoga e acusado riba e punto aki. Pa acusacion number 4 a pidi pa declara esaki solamente parcialmente proba. Aunke el a admiti, pero no por proba cu el a saca cuchiu pa menasa su victima.
Pa e restonan, por declar’e culpabel, segun fiscal. El a bisa cu mirando tur e acusacionnan y kendenan ta e victima di dje, no por bisa otro cu famia tin hopi molester. Ademas, e acusado aki no ta un “first offender”. El a pidi pa dun’e un castigo di 2 aña, kitando e 39 dianan cu el a pasa den detencion preventivo caba.
Su abogadonan mes no tabatin mucho di bisa. Unicamente abogado mr. Ricardo Yarzagaray a cuestiona algo encuanto e partido perhudica na ki momento e por agrega su mes na e caso.
Na final Hues a dicidi di dicta sentencia mesora. El a cera e tratamento y bay di biaha pa e sentencia. A yega na e mesun conclusion cu fiscal di loke por proba y kico no. Dado momento abogado mr. Ricardo Yazagaray no tabata di acuerdo y a bay reacciona. Pero en realidad e procedura a cera caba y e no por reacciona mas y esaki ta loke cu hues a trata di bis’e pero no tabata laga e magistrado papia. Te ora cu esaki a lanta su bos duro y a bis’e “Señor abogado, esaki ta sentencia y bo tin cu scuch’e boca callao”.
El a splica e ora cu un hende cu bira victima di ladron, mester declara su mes como partido perhudica, entre otro for di momento di e denuncia, p’asina por tene esaki na consideracion. E no ta algo cu ta sosode automaticamente.
Na final el a bay di acuerdo cu e demanda di fiscal, esta 2 aña.
