Segun publicacion di de Volkskrant, Staatssecretaris demisionario di Relacionnan den Reino, Alexandra van Huffelen (D66) a keda hopi sorprendi cu e critica fuerte riba su maneho for di Aruba. Ministerdi Finansa, mr. Xiomara Maduro a critica Van Huffelen recientemente pa su conducta colonial, manera tambe su insensibilidad tocante pasado di esclavitud Hulandes den Caribe.
Minister-president di Aruba, Evelyn Wever-Croes a bisa diahuebs mainta cu e ta sostene completo su colega Maduro. Van Huffelen a skirbi diahuebs anochi un reaccion na ANP cu ‘colonialismo y sclavitud no ta pas mes den e manera cu e ta traha hunto cu tur e paisnan den e parti di Reino.’
E secretario di estado a remarca cu e ta papia regularmente cu Gobierno di Aruba tocante supervision financiero y proceso di proyectonan den cuadro cu loke ta herencia di sclavitud. E colaboracion aki segun van Huffelen ta basa riba igualdad y respet. “Mi ta pidi esaki tambe for di mi partnernan den Reino.”
Minister Maduro a bisa recientemente durante un conferencia na Genootschap Nederland Aruba na Den Haag cu Aruba a suspende e dialogo cu Hulanda tocante e projectonan pa loke ta trata Herdenkingsjaar Slavernijverleden pa un tempo indefini.
Ta asina cu segun Maduro, e motibo ta e decision di e secretario di estado pa cobra un interes halto di 6.9 porciento riba e prestamo pa coronavirus na Aruba. “E actitud colonial moderno aki ta nifica cu e disculpa no tin balor. Ta mustra cu despues di 160 aña Hulanda no a siña suficiente di e pasado colonial di sclavitud. Esaki ta un desilusion grandisimo,” segun Maduro a expresa.
Van Huffelen a laga sa cu ainda e no a ricibi ningun comunicado di Aruba tocante si nan kier suspende e colaboracion menciona ariba y kico esaki ta nifica concretamente.
