Recientemente, e comisión di Parlamento encarga cu Labor & Sector Primario, pa prome biaha, a extende un invitación na Gerencia di Departamento di Agricultura, Cria y Pesca conoci como Santa Rosa, pa un reunion y un presentación ariba e plan di maneho y esfuersonan ehecuta.
E distinguido Miembronan di Parlamento cu tabata presente na e ocacion aki, tabata Sr. Hendrik Tevreden como Voorzitter di e comisión acompaña pa Sra. Louisette Christiaans-Yarzagaray, Sra. Shailiny M. Tromp-Lee, Sr. Endy Croes, Sr. Rocco Tjon, Sr. Edgard Vrolijk, Sr. Alvin Howell y Sra. Jacqueline Williams, PLV Griffier.
E presentación a tuma lugar, Diabierna dia 29 di Juni, caminda cu Sra. Nathalie Maduro, Directora pa e Departamento di Agricultura, Cria y Pesca, a duna un presentación basta extenso y habri, splicando e diferente strategianan implementa y e diferente resultadonan y alavez e limitacionan cu mester di atención urgente, pa por logra desaroya e Sector Primario di Aruba den un forma optimal y dunando sostén na tur nos Productornan local. E otro representantenan di Santa Rosa presente, tabata Sr. Di-Angelo Schenker, Chef pa e Seccion Financiero y Sr. Randy Maduro, Relacionista Publico.
Na final di e presentación, e Miembronan di Parlamento, tabata tin e oportunidad pa hasi diferente pregunta, cualnan a wordo contesta di inmediato. Sr. Tevreden, como e Voorzitter di e comisión, a gradici e delegadonan di Santa Rosa pa e presentación y a expresa nan deseo pa por tin un contacto mas frecuente cu e Departamento, pa asina por keda na altura di tur e desaroyonan cu ta tumando lugar cu e diferente projectonan y estudionan cu lo bay tuma lugar. Alavez a keda acorda, cu e comisión lo hasi e preparacionan necesario, pa e Miembronan di e Commision, por hasi un bishita y recorido den Santa Rosa y bishita algún projecto local, pa asina, por tin un miho impresión di kiko Aruba su Sector Primario ta ofrece.
