No ta di awo, sino ta di hopi aña caba, bao tur Gobierno, a maneha e asunto di orario di cierre di clubnan nocturno den forma robes y bruha. Ley mes ta hopi anticua y te ainda ta Minister di Salud Publico ta duna permiso pa habri un club pero Minister Presidente ta duna orario cu por habri y cera, mientras Minister di Husticia mester controla.
Ey caba e problemanan ta cuminsa. Riba dje, clubnan no tin un orario fiho, pasobra tin club mester cera 1:00am den siman y 3:00am den fin di siman mientras otronan tin permiso te 4:00am, 5:00am y hasta 6:00am den fin di siman.
Riba dje, Polis cu mester controla si e clubnan ta tene nan mes na e orario stipula den nan permiso, lamentablemente hopi biaha ta coopera cu clubnan pa nan keda habri mas lat cu nan permiso ta indica. Tin caso cu mesun Polisnan ta traha como Bouncer na porta pa clubnan, cu de facto ta in conflicto di interes. Otronan ta frecuenta e clubnan aki cu frecuencia y como tal ta sinti fastioso pa bay cera nan marduga. Of pa cera e club mientras nan tin coleganan consumiendo alcohol den e mesun club.
Varios manehado di clubnan noturno ta sinti cu nan ta birando victima pasobra e maneho di Polisnan ta di duna preferencia na ciert clubnan nocturno riba otro. A constata cu Polisnan ta mik solamente riba dos of tres club nocturno tur biaha y esaki ta asina bisto cu ta causa reaccion.
E clubnan ta keha cu Polisnan di Noord por ehempel ta molestia dos of tres club nocturno so. For di 15 minuut prome cu e orario pa cera, ya nan ta para caba pafo cu zwaailicht of cu nan presencia pa cuminsa molestia cierto localidad. Mientras cu otronan Polis no ta yega mes.
Diasabra mes Polis a cera un localidad den oranan di mainta. Esaki mester a cera 3or di marduga. E tipo di cosnan aki a cuminsa fada diferente comerciante cu tin basta trahado pa paga. Esunnan cu mester cera 1or no ta cera. Y esaki ta stroba otronan cu tin permiso pa cera te 3or. Tur esaki ta pasando cu bendicion di Polis. Pues e clubnan cu lo mester yena cu e mesun bishitantenan di e clubnan cu mester cera 1or di marduga, consecuentemente ta perde dos ora di benta.
E problema awor ta cu localidad A tin permiso pa keda habri te 1:00am y localidad B te cu 3:00am. Kico Polis ta haci? E ta pasa 2:45am y cera tur. Riba su mes e ta mustra bon, pero e realidad ta cu asina a yuda localidad A pa bende dos ora mas despues di su orario, consecuentemente kitando negoshi di localidad B. Den area di hotelnan esaki ta sosodiendo TUR DIA!
Na Playa tin diferente club nocturno. Den Weststraat mes tin cu ta habri y permiso no ta cuadra. Nan ta uzando permiso di otro negoshi anterior di mesun adres of mesun compleho comercial y Polis ta cay den wega pa e permisonan aki cu ta ilegal. Pa colmo nan ta keda habri gewoon te 5or di marduga. Aki Polisnan di Playa ta faya.
Ta wordo bisa hasta cu tin comerciante cu tin nightclub na Playa cu ta yega na Minister y su consehero y esey ta causa cu no ta mishi cu nan.
Ademas tin hefenan den Cuerpo Policial cu tur tempo a haci bida di cierto club nocturno practicamente imposibel. Awendia algun di e hefenan aki ta den top di Polis y esaki ta duna nan e poder pa asina instrui otronan mas abou pa tur dia bay molestia cierto nightclub pero laga otronan viola leynan di cierre.
Na Bushiri tin un nightclub cu tur dia cu e habri ta viola tur clase di orario di cierre. Hasta Guarda Nos Costa a bay na e localidad recientemente y detene basta hende muhe ilegal.
E asunto aki Mando Policial mester mira di masha cerca y actua cu mesun midi. No hancho pa un y smal pa otro.
