Diahuebs anochi varios studiante, ex-studiante, docente y ex-docente di John Wesley College, a participa den un candle light vigil p’asina demostra e speransa cu nan tin pa mantene e scol habri.
Manera ya ta conoci caba, e aña escolar aki lo t’e ultimo suspiro di e scol, ya cu SPCOA, e fundacion cu ta encarga cu maneho di e scol, a yega na decision pa clausura e scol, mirando e cantidad di studiante ta minimal y no ta mira motibo pakico mantene habri.
Tabatin un cantidad di ‘outcry’ den comunidad pa mantene e scol habri y ni e minister encarga cu enseñansa por a haci algo di su parti, indicando cu t’e fundacion t’esun cu tin e decision ey den su man.
Christopher James, kende ta ex-alumno di John Wesley, ta un di e motornan tras di e vigilia aki. El a conta cu e anochi a bay sumamente exitoso. E mes tabata sorprendi pa mira tanto hende. El a spera por ta cu nan lo a haya 50 hende.
James a haya un atake politico recientemente y esey tabata fo’i man. Ta un discriminacion pa su persona, el a indica. Pero pa mira tanto hende a sali, hende fo’i San Nicolas, Savaneta, Pos Chikito, Cura Cabay y hasta Playa y Noord, a bin San Nicolas pa mustra nan sosten cu nan tambe no ta contento cu John Wesley College ta cerando su porta.
Durante e anochi aki tabatin diferente persona cu a hiba palabra. Segun James esaki a bay tremendo. A scoge algun persona clave cu tabatin un mensahe positivo pa John Wesley y sa un tiki di su storia. Tambe a invita algun parlamentario pa t’ey presente.
Pa mas detaye lesa TREMPAN.
