Gobierno a anuncia un cambio den ley pe crèchenan. Esaki ta significa cu e crèchenan a haya nan mes ta bay aumenta nan prijs, pasobra e cambio aki ta pone cu sea nan tin menos mucha of mester busca mas leidster. E crèchenan no ta haci uzo di ratio, esta cantidad di mucha pa leidster.
Ilaysa Leañez, un mayor, ta haya cu un banda esaki ta bon pero di otro banda no. El a splica cu p’e banda di siguridad esey ta algo bon, pasobra tin caso cu a pasa y esey ta di lamenta. Di otro banda e ta bira costoso pa esunnan cu no por paga e prijs di crèche. Esey ta pone cu e muchanan lo ta na cas y probablemente e mayor sin por wak bon p’e yiu. Probablemente ta hiba e muchanan otro caminda. E ora e siguridad na cas no t’ey.
Leañez no ta considera di paga e dobel, pasobra e ta haya cu esaki ta un tiki di mas. E ta kere cu si aumenta e prijs cu shen florin mas e ta oke, pero a enfatisa cu e ta mira e parti di siguridad. E ta kere pa no dobel e prijs. Si ta medida di gobierno, e no kier bisa, pero si ta kere cu e ta algo esencial.
Walkuiri Gonzales, mayor preocupa, a indica cu e no ta di acuerdo p’e crèchenan aumenta prijs. E cosnan no ta bon pa aumenta mas. El a confirma cu ya caba di a haya un carta di crèche riba e aumento di prijs.
E ta haya cu e cambio aki den ley ta un medida di gobierno. Riba e parti si ta dispuesto pa paga e suma nobo, el a indica cu esey no ta algo bon pa paga. Si e prijs subi, e ta bay mira kico pa haci.
Talina Williams, mayor preocupa, a expresa di no por duna su opinion ainda. El a sigui indica di no a lesa tur cos ainda. Si ta dispuesto pa paga e aumento, el a indica cu si nan haci esey y tanten e crèchenan tin nan motibo y ta honesto pa bespreekbaar, tin di mira te unda e ta rasonabel.
Si esaki ta un medida di gobierno, e ta kere cu tur centro mester tin nan motibo, kisas tur cos por ta of no conecta na gobierno. Di otro banda, specialmente pa esunnan cu no tin netwerk, esaki ta unico forma pa tin netwerk pa cuido di mucha na momento cu e mayor ta trahando.
