Hopi hende a cuestiona e caso di “Vacuna Gate” pa motibo cu despues di tur loke cu a scucha rond, den corte diahuebs mainta a presenta solamente tres acusado.
Ta parce cu e grupo aki a carga e peso di ley mientras cu e otronan a keda tras di cortina. Ta menciona esaki pasobra ta imposibel cu e tres personanan por a comete e delito aki sin ayudo di un persona di mas conocemento. Un conocemento cu ta bay mas leu cu solamente hinca un password den e computer.
Fiscal mes den su rekisitorio a bisa cu den e investigacion a sali na cla e acusado Maikel Maduro na mas cu un ocasion a drenta e sistema for di su cas, ya cu e tabata geschors, pa hinca e datonan. Den otro palabra, registra nomber di e personanan cu no a haya vacuna of no completo, pero cu tabatin mester di nan certificado pa un motibo of otro.
Den otro organisacion no ta existi un solo password cu ta uza pa drenta computer na trabou. Cada persona ta haya su mesun username y password pa ora di login. Mas ainda cu informacion sensibel, manera den e caso aki. Ta papia aki di datonan personal di e ciudadanonan.
Con por ta posibel cu un di e acusadonan ta bisa cu ta uza un laptop unda cu tur hende tin acceso na dje, ta uza solamente un solo password. Si e lanta, cualkier persona por uza e laptop ey pa hinca informacion of saca informacion. Ta papia aki di DVG. Ta imposibel pa kere cu DVG ta anda asina nonchalant cu nan sistema di banco di data.
Con por ta posibel cu un otro acusado ta duna un otro contratista cu tabata traha cu DVG password pa drenta e computer y no e password di dje pero di otro trahado.
Ta conoci cu ningun hende cu ta traha cu gobierno ta permiti pa duna otro hende nan password. E unico cu tin tur e codigonan t’e IT(nan) pa ora tin problema cu e sistema, pa drecha e sistema. E pregunta ta: “Dicon no a investiga mas leu con ta parce cu tur hende ta cana cu password di otro y haci negoshi?”
Si Landsrecherche no a haci nada riba e punto aki, ta keda na Ministerio Publico pa habri un otro investigacion pa no perde credibilidad di un investigacion cu ta mustra defectuoso. Pa Maikel Maduro y Gerald Oliver a pidi 18 luna di cual 6 luna ta condicional, 3 aña di prueba, 240 ora di trabou pa comunidad y boet di 2500 florin. Pa Jonathan Ridderstap, kende a hay’e cu un sakito di cocaina tambe, a pidi 22 luna di cual 18 luna ta condicional y p’e tambe a pidi trabou pa comunidad y boet. Dia 8 di juli tin sentencia.
