Ora nos ta obedecido na Dios nos tin siguridad den tur cos , pasobra Dios ta para na banda di hende obediente. Dios ta e sombra na banda di hende obediente, mientras cu esunnan cu ta cana den desobediencia lo conoce insiguridad y silencio di Dios.
Awendia hopi biaha bo ta tende hende ta bisa of expresa cu nan tin miedo, nan ta sinti nan mes discrimina,nan ta sinti nan mes insigur cu nan lo wordo acepta, tur eseynan ta fruta di desobediencia.
Ora un mucha no ta comporta su mes bon, no ta tende di su mayornan, e ta haci locual cu e kier, tur ora e ta insigur pasobra e sa cu e ta den desobediencia, y su relacion cu su mayornan ta deteriora.
Pero ora e mesun mucha ey ta obediente, tur ora e ta contento y sigur cu si e acerca su mayornan pa algo, e ta haya un si di su mayornan, y su mayornan ta apoy’e den tur locual cu ta bon.
Awel ta mescos cu Dios, ora nos ta cana den obediencia, nos tin sigur di e amor y proteccion di Dios, aunke nos no ta mira Dios, nos sa cu Señor t’ey.
Ta den obediencia solamente nos ta cana bao di sombra di e Altisimo. Hende desobediente hacido di bofon di Dios no conoce e sombra di e Altisimo, pasobra nan mes no kier drenta bao di e sombra, nan no kier arepenti for di nan mal caminda, Pasobra e sombra di e Altisimo ta pa tur hende obediente.
Den Galationan 5:22-23 nos ta conoce e frutanan di Spirito Santo , cual nos ta yega na dje pa medio di obediencia na Dios. Pasobra e Spirito di Dios ta keto caminda tin desobediencia, ma caminda tin obediencia, tur porta ta habri, y Dios ta revela su mes na nos.
Mescos cu prome cu un hende biaha pa un tera lehano e ta informa di tur cos un poco pa e ta na altura y no hinca su curpa den problema, ta bon pa nos tambe tende cuenta cu tur locual desobediencia por trece pa nos y no uza e palabra “Laga mi biba mi bida” pasobra e bida ey no ta di bo , e curpa no ta di bo e ta di Dios, (1 Corintionan 3:16-17) p’esey nos mester ta obediente na Dios.
Esaki ta algun ehempel ora nos laga desobediencia domina nos bida:
* No plania maldad contra bo prohimo, mientras cu e ta biba cu confiansa banda di bo.
* No envidia un hende di violencia, ni scohe ningun di su caminda nan.
* Pasobra hende perverso ta un abominacion pa Señor, ma e tin comunion intimo cu hende recto.
* Maldicion di Señor ta riba cas di e malvado, ma e ta bendiciona e luga di biba di e husto.
* E ta haci bofon di e hacidonan di bofon, ma E ta duna gracia na e humilde.
* E sabinan (hende obediente) lo hereda honor,ma bobonan (Hende desobediente na Dios) ta montona berguensa riba nan mes (Proverbionan 3:29-35).
Awor aki mes den e resultadonan di aña escolar nos por mira e fruta di obediencia, cual ta un smile grandi y tin biaha hasta lagrima di parti di mayor y yiu, ora nan mira cu hunto nan a logra.
Pero otro banda tin tristesa y preocupacion entre mayor y yiu, pasobra obediencia a wordo neglisha. Obediencia ta miho cu sacrificio. Tur porta ta habri pa hende cu ta biba de obediencia na Dios.
Sinceramente,
Pastoor Marcel Balootje.
