Den un conferencia di prensa awe e sindicato di Cuerpo di Duana SADA a informa cu miembrecia a dal un paso atras riba e posicion inicial tuma relaciona cu reduccion di 5% di salario. Esaki Edward Maduro, presidente a informa.
Maduro a cuminsa pa enfatisa cu semper nan a trata di yega na solucionnan na mesa y ora cu no logra, ta dicidi di tuma otro pasonan, cu semper mester carga aprobacion di e miembronan. Den e caso di reduccion di salario cu 5%, inicialmente a bay di acuerdo cu esaki pasobra nan ta sinti cu nan mester ta solidario cu pueblo. Pero na momento cu a tende e palabra cu e reduccion ta keda vigente “tot nader orde”, nan posicion a cambia. E ultimo aki ta diferencia di loke Conseho di Minister a presenta na nan dianan 17 y 20 di april. “Bo no a yama nos pa informa nos prome cu sali bay prensa pa informa cu Hulanda ta esun cu a manda bisa “tot nader orde”. Nos tin cu bisa cu nos a bin ta custumbra caba cu desde 2018 Gobierno ta hibando un maneho unilateral. Si e tabata algo urgente, por a yama e sindicatonan e mainta ey di dia 15 di mei pa informa di kico tabata e posicion di Conseho di Minister. No tin excusa pa no yama e sindicatonan.”
P’esey mesora SADA a yama su miembronan pa un consulta. Den e reunion a dicidi cu nan no ta bay den un accion of manifestacion pa awo, pero cu mester informa cual ta nan posicion, den un conferencia di prensa. SADA ta keda solidario. Esaki ta algo cu nan a bisa for di prome instante, ora cu a bay di acuerdo pa kita e 5% for di nan salario pero si a pone algun condicion e tempo ey. A pidi pa retira pensionadonan cu ta trahando aworaki como coordinador, of laga nan traha como Pro Deo. A haci algun pregunta, riba cual nan no a haya contesta ainda.
E miembronan a bisa cu debi na e expresion “tot nader orde” nan no ta di acuerdo pa kita esaki di nan salario, apesar cu nan salario netto lo subi un tiki. “Nos ta sinti cu nan ta hunga cu inteligencia di e ambtenaarnan, y e pueblo. Nos tabata sa di antemano cu ora kita 5%, e pensioen lo sufri un tiki. Pero door cu Gobierno a bisa cu esaki lo ta te cu 31 di december, 2020, a bay di acuerdo. Pero si no sa cuanto tempo e medida lo dura, e miembronan no por permiti pa nan “pensioen opbouw” sufri pa tempo indefini. “Pa medio di esaki nos ta informa Gobierno cu nos no ta carga e pensamento cu e 5% mester wordo kita di e salario. Nos kier pa e 5% wordo poni como un tipo di solidariteitsbelasting riba nos payslip, apart di bezoldiging, pa scapa nos “pensioen opbouw”. “
SADA a duna un presentacion di un payslip pa demostra con e efecto di e 5% riba salario y na banda, kico e lo nifica pa e ambtenaar.
Maduro a bisa cu nan tin duda of problema pa kere cu ta Hulanda a pone e reduccion di 5% for di salario. Dia 20 di mei Gobierno a manda un carta pa hefenan di departamento, den cual ta bisa cu den reunion di Conseho di minister di dia 17 di april, a aproba algun medida. Esaki tabata e dia cu a yama e sindicatonan pa prome biaha y no a bisa nan nada cu e ta ‘tot nader orde”. Mirando con e sindicato y su miembronan a wordo engaña den pasado, nan tin duda cu e ta un decision di Hulanda. Y tampoco a bisa nan cu loke cu entrega e ambtenaar lo no haya bek tampoco. “Bo mester tabata sincero for di prome instante. Nos ta solidario, pero ta pidi pa ta sincera na mesa. Si a aproba e puntonan aki dia 17 di april, mester a informa nan di e decision ey e dia ey. Nan ta sali hunga mooi weer pero no ta sincero tampoco, ni cu pueblo. Nan ta manipula cu informacion y ta un patronchi di e Gobierno aki.”
Hecho ta cu e miembronan di SADA no ta nada contento y el a bisa cu kisas awo Gobierno ta bisa “tot nader orde” y kisas otro aña nos ta haya chens pa bisa Gobierno “tot ziens”.
