E prome informacionnan saliendo di e investigacion financiero tumando luga den Servicio di Limpiesa Aruba (SERLIMAR), ta mustra cu e situacion di e compania ta hopi serio. E ta asina delicado, cu ni si tur ciudadano paga nan debe di servicio di recogemento di sushi domestico, cu ni asina e compania lo scapa. Su gastonan di operacion ta mucho mas halto compara cu su entradanan.
Parce cu ora a conta e tarifa di recohemento di desperdicio domestico, a tuma decision politico y no comercial. Cu esey e tarifa mensual mester ta mucho mas halto di locual e ta awo, cu ta Afl. 25,= pa luna. Na Corsou por ehempel e tarifa pa recogemento di desperdicio domestico ta di Naf. 35,= pa luna sin procesamento manera ta haci aki na Aruba.
E ultimo añanan, den forma delibera, Gobierno y gerencia di SERLIMAR a haci mucho mas gasto di locual nan por paga. Probablemente nan a conta cu na final semper Gobierno lo tin placa pa sigui inverti den e compania. E maneho a bira estilo di un bari sin fondo, den cual e Director General, Hensley Davelaar tabata sigui ordo directo di Minister Otmar Oduber pa compromete e compania na gastonan absurdo y firma contractnan lucrativo pa comerciantenan yega na e mandatario.
Entretanto a core cu e Director General, cu ainda ta purba negocia cu SERLIMAR pa logra un “golden handshake” di e compania.
E situacion financiero critico cu Aruba ta hañ’e aden no ta laga ningun espacio pa subsidia ineficiencia y CAFT (Gobierno Hulandes) a pone condicion pa yuda Aruba financieramente pero sin subsidio pa Serlimar.
Pa awor Minister Marisol Lopez tin un tarea sumamente dificil pa sanea Serlimar y e mester mira con e ta yuda e compania y hib’e na un siguiente nivel di progreso y innovacion den eficiencia comercial.
Gobierno probablemente lo ordena Serlimar pa e ta solbabel riba su mes, sin inyeccion financiero di Gobierno. Pa realisa esey, lo mester adapta e tarifa mensual di recogemento di desperdicio di cas.
Pasobra awo, e combinacion di cobra di menos pero gasta di mas ta receta pa desaster, cu ta precisamente locual ta experenciando awe den SERLIMAR.