Parlamentario independiente Ryçond Santos do Nascimento ta na Hulanda den cuadro di e reunionnan di IPKO na Den Haag cu ya practicamente a yega su final.
Un di e temanan cu a trata ta ombudsman y tambe e posibilidadnan di estudio di e Arubianonan na Hulanda cu tin diferente dificultad. Ta sinti cu no ta duna nan suficiente atencion n’e problematica aki.
E parlamentario a cuestiona kico nos mes por haci na Aruba. Na Aruba, Corsou y Sint Maarten tin universidad unda cu tin programa di bachelor, programa di masters. Si ta inverti mas den enseñansa superior n’e islanan mes, ta soluciona parti grandi di e problema.
KICO T’E PROBLEMA
Hopi di e studiantenan aki tin problema pa haya vivienda. Hopi di nan tin e problema den e parti administrativo, cu ta hopi cos nan tin di regla na Hulanda riba nan mes, cu nan no ta custuma cu ne. Si ta keda Aruba, no tin e tipo di e problemanan ey. Tambe e seguro medico.
Cos asina hopi basico y fundamental ta bay robes na Hulanda. Ombudsman ta pushando pa gobierno di Hulanda haci mas riba e area aki. E ta pushando tambe pa duna miho informacion n’e studiantenan. Pero alabes e pregunta ta cu si no ta un idea pa no cuminsa inverti mas den enseñansa den nos mesun cos.
PAKICO
Un studiante cu keda Aruba tin menos debi cu e ta ‘build up’ pa su mes. Chens p’e keda Aruba ta hopi mas grandi. E chens cu e lo colabora despues y duna di su parti na e futuro di nos pais, ta bira hopi mas grandi. Y asina e ta yuda su mes y ta yuda nos isla bay dilanti.
Tin hopi motibo pa inverti mas den estudio na cas, pa hisa e nivel di estudio na cas y asina influencia tambe e gobernacion di mañan.
Si ta completamente honesto, enseñansa manera e ta awo, no ta manera e mester ta. Nos studiantenan no ta domina Hulandes y e otro idiomanan. Esey ta e realidad n’e momentonan aki y na mesun momento por mira cu nos gobernacion tampoco ta riba nivel. Si ta inverti den esaki, ta invertiendo den hisa e nivel di Aruba di mañan.
