Siman pasa, no menos cu dos grupo di studiante, ambos di Colegio Arubano, a scoge 24ora.com pa nan proyecto relaciona cu e materia di Papiamento. Un grupo ta den 3de VWO mientras cu e otro ta den 3de HAVO. Ambos tabata kier sa mas di e trabou cu ta desplega tur dia den e compania. Tambe a haci preguntanan relaciona cu e districto di Oranjestad, kico nos ta sinti cu falta pa haci Playa miho, etc. A scoge pa papia cu nos colega Patrick Paskel, kende separa di ta co-presentado di Enfoke tur merdia hunto cu Nelson “Speed” Andrade, tambe ta den e team di maneho di Headlines Group, compania cu ta maneha 24ora.com y Trempan.
E team di studiante di 3de VWO ta consisti di e hobennan Christopher Velasquez y Joshua Geerman. Ambos a scoge pa sinta den e stoel di Enfoke y a entrevista Patrick Paskel. Solamente cu nan a sinta den e stoel di presentado y Paskel den e stoel di invitado. A hacie tur e preguntanan aki graba, al estilo Enfoke. Pa nan tabata un honor di por a sinta na e luga ey y a expresa di ta spera cu den futuro nan por logra haya mas interes pa sigui un carera den media.
E otro grupo no a graba sinta den e set di Enfoke, sino a opta pa hunto entrevista Patrick Paskel den su oficina. Ta trata di e team forma pa Nathan Puriel, Jean Julneau, Dyron Reeder, Michelle Milton Salazar y Sharik Villamarin Pinzon. Nan proyecto ta relaciona cu e tema di e trimester, cual ta Turista Riba Mi Isla. E proyecto mes yama Conoce Bo Bario. Manera su nomber mes ta indica, e alumnonan den grupo mester haci investigacion tocante un bario of districto di Aruba y traha un video documentario. E documentario aki mester inclui un parti di historia di e bario, un entrevista cu un persona di e bario cu a sobresali den tereno di deporte of arte, por ehempel y un parti creativo. E parti creativo aki por ta un poema, un sketch, un cantica, teniendo cuenta si cu esaki mester conecta bek cu e bario cu nan a scoge.
Tocante 24ora.com
Den aña 2022, e website mas mira na Aruba, esta 24ora.com, a crece cu 33,59% den audiencia. Tambe a nota desaroyonan importante den cambio di comportacion di usuarionan, por ehempel e pagina mas mira ta e frontpage di 24ora pero e di dos pagina mas mira a bira anuncio di morto, sigui pa suceso y despues e pagina cu noticia local. Riba Facebook tambe 24ora ta raporta un crecemento impresionante! A cera aña cu no menos di 119.591 likes riba Facebook, mientras cu e cantidad di siguido (followers) ta 165.977. Riba Instagram nos tin 19.726 siguido. Cifranan aki ta marca un crecemento grandi compara cu e aña prome.
Video ta Rey!
Den video, 24ora.com ta raporta cu e aña cu a transcuri, nan usuarionan a mira 80.9 miyon minuut di video riba Facebook, cu ta traduci den 11.3% menos cu e aña anterior. Esey por tin di haber cu awendia ta publica e videonan riba Youtube pa bay riba e site y riba Facebook ta keda separa. Di otro banda Youtube a crece bon e aña aki. E videonan miho mira ta di februari y maart di e aña cu a termina. Esun miho mira ta dia 11 di februari 2022, pa buskeda pa un persona cu a agredi chauffeur di bus y core bay sconde den hotel. A mira 1.272.962 minuut na video. Un total di 776K usuario a mir’e. Esun mas mira ta di 20 di maart 2022, di un brommer di coriente cu a pega candela den un parada di nos Dia Nacional. 914.466 usuario a mira e video aki! Mester menciona cu entre e videonan miho y mas mira ta tambe e edicionnan di Enfoke di merdia. Usuarionan tin un tendencia di consumi como dos ora di video tur dia riba 24ora pa mira e noticiero, cu ta traduci den mas “engagement” riba nos site.
Conkista mercado nobo
Nos enfoke awo ta riba Hulanda, na unda tin 170 mil Hulandes cu a nace na Aruba, Boneiro, Corsou of islanan SSS ta biba. Ta un mercado mas grandi cu Aruba di hende cu ta papia Papiamento y cu kier sa mas di nan isla y hasta di kico ta sosode na Hulanda, pero den nan idioma. Nos tin un pida di e mercado ey caba, pero nos ta bay pa conkista mas!
Tocante Colegio Arubano
Colegio Arubano ta situa na Vondellaan 14 desde su fundacion na aña 1959. E ta resorta bou di e fundacion SMOA. Ta conta cu riba 100 docente cu ta duna les na mas o menos 1500 alumno. Un estudio haci na aña 2007 a demostra cu tin espacio pa mehora e calidad di enseñansa na e scol, unda 50% di e studiantenan ta termina nan examen di HAVO cu exito y 60% di esunnan di VWO.
