Copa Noord 2019 a continua riba veld di Kudawecha. Copa Noord a inicia desde 5 di Mei y awor ta drentando su siman culminante cu e gran final 29 y 30 di Juni. Den un ultimo partido di primera buelta Royal Power Tat Fat Home Depot a baha fuerte riba un di e grandinan di Copa Noord esta Calabas Blue Jays y ta logra derota Calabas Blue Jay’s cu score comodo di 11-2.
Royal Power ta pika ariba 4-0 den bom di promer inning y nunka mas a mira atras ampliando e score cu 2 careda mas den bom di 3 inning pa hasi e wega 6-0. Calabas Blue Jay’s ta rally den cabez di 4 inning pa 2 careda pa corta e ventaha 6-2. Bom di 4 y bom di 5 inning Calabas ta logra mantene Royal Power cu 0 careda esta dos inning lamoenchi lamoenchi pero den bom di 6 inning Royal Power ta “herenga” y ta rally pa 5 careda mas pa hasi e score 11-2.
E veterano “cabayo de hierro” Alvaro Barrios despues di a permiti 2 careda den cabez di 4 inning a hala braza mara y a pone 3 inning di 0 careda den fila pa seya e victoria riba su nomber cual ta su di 4 victoria den Copa Noord 2019 riba su nomber. Di otro banda Rodney Kelly mester conforma su mes cu e derota. Boxscore final Royal Power 11 careda, 12 hit, 2 error. Calabas Blue Jays 2 careda, 5 hit, 2 error. Royal Power como equipo a bay di 32-12 pa un averahe di 375 mientras Calabas a bati di 28-5 pa un averahe di 178.
Mihor bateadornan pa Royal Power ta Edmar “Macho” Tromp 4-2 cu un doblete, Franco Wouters 4-3 incluyendo un doblete, Kelvin Silvania 2-2, Luis Pelayo 2-1, Gregory “Pilin” Krosendijk di 3-1. Pa Calabas Blue Jay’s a destaca na plato Alfred v/d Linden 3-2, Ryan Richardson, Lenny Ashby Jr ambos di 3-1. Cu e resultado aki Royal Power Tat Fat Home Depot a clasifica na promer lugar. Copa Noord 2019 ta den ful swing drentando su recta final fin di e siman aki anticipando e gran final diadomingo 30 di Juni. Softball den desaroyo!
