Copa Noord e aña aki organisa pa e muchanan di Tanki Leendert Giants a inicia siman pasa. Den e segundo siman di Copa Noord Royal Power biniendo di un derota contra Calabas Blue Jays di 10-7 mester a regroup pa pone e stempel cu e aña aki cos ta bay ta otro y mester tene debido cuenta cu nan.
Kudawecha Redskins Pizza Hut campeon di Copa Noord 2017 a sali gana Tanki Leendert Giants siman pasa doñonan di e torneo e aña aki y a pensa cu cos lo bay ta un pasa. Sinenbargo ora cu Kudawecha Redskins a topa e troncon nan duro di Royal Power cu nan pitcher veterano Alvaro Barrios riba monticulo enfrentando e “ace” di Redskins esta Arjen Mathilda cos a bolter. No obstante trayectoria di ambos equipo Royal Power tin alrededor di 7 titulo den Copa Noord contra 2 di Redskins.
Royal Power cu un equipo bastante rehobenese a mustra talento y profundidad den e wega. Redkins ta pica ariba 1-0 den promer inning. Desde aki Alvaro ta hala faha mara y den bom di 4 inning Royal Power ta rally pa bolter e score 2-1. Royal Power ta rally un biaha mas den bom di 5 inning cu 3 careda pa amplia e score 5-1. Den cabez di 6 inning Redskins ta menasa anotando 2 careda pa hasi e score 5-3.
Den cabez di 7 inning Redskins ta subi cu dos base por bola tanto Alfred Williams y Julio Hernandez poniendo precion riba Royal Power pero Royal Power ta keda “composed” den su wega unda Rolando Bido Guzman ta conecta un bataso fuerte pa shortstop Franco Wouters kende ta lanta bon cune ta bolter pa Edmar “Macho” Tromp pa segunda kende ta rifla primera pa completa un double play na e momento crucial pa caba cu e speransa di Redkins. Redskins no kier a entrega y ta saca e trabuco Angelo “Appel” Laurant pa purba bula waya pa keda den wega. Manager di Royal Power ta sali bay papia cu Alvaro Barrios pa mantene e plan di wega y keda trankil unda Appel ta conecta fly pa rightfield y Giandrick Lacle ta fildea esaki cu tur trankilidad pa Royal Power seya e victoria. Royal Power 5 careda, 7 hit, 1 error. Redskins 3 careda, 8 hit, 0 error.
Mihor bateadornan pa Royal Power a resulta Dijendrick Croes y Giandrick Lacle di 2-1, Jomark Flanegin 2-2, Kenny Hart y Edmar Tromp di 3-1. Pa Redskins a destaca na plato Ray Bernabela y Richinell Matos ambos di 3-2, Derward Ruiz 2-1, Julio Hernandez y Michael Fingal di 3-1. Diasabra y diadomingo awor weganan di Copa Noord lo continua riba veld di Centro Bario Noord.
