Curoil un kompania di Gobièrnu ku su kuenta anual di 2016 ta indiká ku promé ku e paga impuesto na Gobièrnu e tin un ganashi di 39 mion florin i e kuenta anual di Curoil di 2017 ku ta indiká ku promé ku e paga impuesto e tin un ganashi di 22 mion florin, ta indiká ku e kompania aki i Gobièrnu no tin pakiko di dune un oumento di margen di 3 sèn mas di ganashi riba Awa, Koriente, Gasolin i Disel. Esaki ta simplemente un MEDIDA skondí den un bachi pa garantisá kobro dividendo.
Loke si ta bèrdat, ta ku na momentu ku bo tuma desishonnan robes, pa kumpra un barku ku su operashon ta karu, debí ku e ta para na waf sin ta move pa generá flete i ku un tripulashon abordo ku tur dia ta kosta hopi plaka, esaki ta pone ku pa mal desishon di gabinete Rhuggenaath, awor ta pasa e faktura pa pueblo paga den preis di Awa, Koriente, Gasolin i Disel. Gobièrnu ta hopi robes, simplemente mester a traha mas tanki (un solushon duradero) pa por warda produktonan petrolero i no drenta un aventura di kumpra un barku i mara esaki na un werf, ku un kosto di 11.000 dòler pa dia.
Parlamentario Gerrit Schotte tabata sa di nan intenshon di presentá e medida aki i ta p’esei mi a hasi e pregunta klave na promé Minister Rhuggenaath i Minister Steven Martina djamars 28 di ougùstùs 2018 durante di un reunion públiko di Parlamento riba e gastunan di e barku aki. Pero nan a ninga di duna mi kontesta riba e pregunta aki, no opstante ku nos Areglo di Estado, artíkulo 57 ta indiká ku Ministernan mester kontesta preguntanan di Parlamentarionan.
Ministernan Rhuggenaath i Steven Martina ta hasi nan mes personanan no konfiabel skondiendo informashon pa Parlamento di Kòrsou.
Ku e oumento aki di 3 sèn, Gabinete Rhuggenaath riba proposishon di Minister Steven Martina a presentá den Konseho di Minister di djárason 29 di ougùstùs 2018, a aprobá un medida ku ta bai generá mas plaka pa Minister Kenneth Gijsbertha por tapa burakunan finansiero den presupuesto.
