Campeonato HEINEKEN fast pitch di Aruba Softball Bond dedica na dos baluarte Wiwi Maduro y Chin Thiel a continua durante siman riba veld di Pos Chiquito.
Den categoria AA Royal Power ta baha fuerte riba e muchanan di Carlos Mejia esta Macuarima Indians y ta propina Macuarima un knock out ganando 9-0. Jomark Flanegin tabata excelente riba monticulo poseando un tremendo dominio y control cubriendo henter e ruta pa seya e victoria riba su nomber. Jomark a lansa un total di 64 lansamento, 21 bola, 43 strike, 4 strike outs, 1 base por bola ta permiti 2 hit, 0 careda pa un Earn Run Average (ERA) di 0.0. Carlos Croes di otro banda a tira 88 lansamento, 32 bola, 56 strike, 2 ponche regalando 2 base por bola permitiendo 13 imparable y 9 careda pa un ERA di 12.25.
Royal Power 9 careda, 13 hit, 0 error lagando 4 coredor den circulacion. Macuarima Indians 0 careda, 2 hit, 1 error y ta laga 2 coredor na base. Mihor bateadornan pa Royal Power a resulta Gregory “Pilin” Krosendijk 3-2, Mitchel Martes 3-3, Aigil Brete y Giandrick Lacle ambos di 1-1, Kenny Hart di 2-1 y Pierre Milangelo Junior Richardson di 2-1. Pa Macuarima Indians Benjamin Geerman a bay di 1-1. Weganan lo continua diasabra 6pm y diadomingo 11 am na veldnan na Pos Chiquito. Tanto diasabra y diadomingo lo ta weganan femenino. Softball organisa a la carga!!!
