Awe merdia Corte a sigui cu tratamento di e caso contra Risheila Frans, mama di e dos rumannan Eugene y Rishandroh, kendenan a perde nan bida door di maltrato pisa causa pa nan padrastro. Ministerio Publico a mantene su mesun posicion cu e tabatin dia 15 di juni.
Anteriormente a habri e caso aki bek pa laga un otro psikiatra evalua e acusado aki pa motibo cu e rapport di e momento ey di psikiatra y psicologo ta contradeci otro. E rapport cu a wordo traha awo door di un psikiatra no a duna contesta specifico pero pa Ministerio Publico e rapport ta confirma loke tin para den e procesverbaal di e caso aki: Risheila no ta sufri di un malesa mental cu por considera cu e ta menos responsabel pa su actonan.
Ta berdad cu e tin e sindrome di muhe maltrata, ta sufri di depresion pero Fiscal no ta kere cu e ta un persona cu no por defende su mes. A uza como prueba di esaki, declaracion di su ruman cu ta bisa cu tin biaha Risheila por ta agresivo; declaracion di un otro famia cu a bisa cu “Sheila ta un muhe agresivo” y a splica pakico e ta bisa esey (su forma di papia y reacciona); pero tambe declaracion di un bisiña, kende a bisa cu e sa tende gritonan duro ora cu e pareha ta pleita y por scucha Risheila papia fuerte y palabra malo.
Pues Ministerio Publico no ta mira motibo pa desvia di su demanda anterior di 4 aña di cual 1 aña condicional pero pa “medeplichtigheid”, di tabata sa di loke a pasa cu su yiunan y no a bati alarma of a haci denuncia. Manera e ultimo acusacion contra dje ta bisa: Ta acusa e mama di a laga e dos menornan varios biaha y intencionalmente den un estado desampara (mientras e tabata sa cu nan tabata wordo maltrata gravemente y cu frecuencia pa e padrastro y cu nan no por a defende nan mes) dor di keda sin actua na ora y/of dor di keda sin hiba nan na un luga sigur na ora y/of dor di keda sin proteha nan y/of dor di keda sin duna nan ayudo medico y cuido medico adecua, loke tabatin lesion grave y nan morto como consecuencia.
Fiscal a splica cu pa “medeplichtigheid” (cu e mes no a comete e acto) ley ta permiti’e pidi un tercera parti di loke e acusado principal a haya, esta 5 aña. Pero a tene cuenta cu e tambe a wordo maltrata pa un periodo largo y e ta sufri di depresion.
E mama na final a haya chens di ultimo palabra y a bira nervioso y pa sigur un minuut no por a expresa su mes. Na final el a pidi disculpa loke a pasa y ta sinti hopi dolor y e no kier pa ningun hende haya nan mes den e situacion cu el a pasa aden.
Dia 14 di september proximo lo tin sentencia.
