Dialuna atardi, famia real Hulandes tabata di bishita den e cayanan di San Nicolaas, unda cu lo tin un programa cultural prepara pa nan.
Aruba Warrior a probecha di e oportunidad aki pa tene un accion di protesta pa famia real. Presente tabata t’ey Anouk Balentien, cu a manda un carta habri pa Su Mahestad Rey Willem-Alexander pa e garantisa e derecho humano, ancra den Statuut cu ta indica cu ora e Gobiernonan no ta garantisa e derechonan humano, t’e Rey mester garantisa esaki. Nan kier tin derecho riba aire limpi, mescos cu tur otro ciudadano den Reino Hulandes.
Sigur no tabata algo bunita cu dump tabata na candela na momento cu nan a aterisa na Aeropuerto Reina Beatrix, riba cual Balentien a bisa cu e situacion di dump ta di lamenta y alabes, cual el a purba mustra cu su carta, unda cu ta bisa cu a pesar cu Parkietenbos ta cera, e violacion di derecho humano ta algo cu ta permanece. E ta pidi Su Mahestad pa activa RIVM y no laga esaki mas den man di nos gobernantenan, ya cu na Aruba, no tin hende capacita pa haci e trabou aki.
Presente tabata t’ey tambe Helen Croes, cu a bisa cu nan ta bin pa cambia e encuentro entre e indjannan y e colonisadonan na 1636. Awo ta na 2023 y mester hacie na un otro manera. “Mester cuminsa bisa nan (e colonisadonan) a kita e tera for di nos y cu nan mester dun’e bek. Ta nos ta manda aki (na Aruba), ya cu nos tabata e pueblo original di Aruba,” Croes a bisa.
Pa loke ta e disculpa duna door di Gobierno Hulandes, p’e pasado scur di sclavitud. Croes a bisa cu nan no kier disculpa, ya cu disculpa ta mustra duele y nan no mester di duele. Loke nan ta exigi ta derecho, derecho riba nan mesun tera, tur e recursonan natural cu nan a bay cu ne for di nos isla. Nan no mester di disculpa, y nan a skirbie tambe den nan manifiesto, cu nan no kier disculpa di e rey.
ANP
Prensa Hulandes tambe a mustra hopi interes den e accion aki di e ‘Rubianonan, cu ta preocupa pa e situacion di medio ambiente, e situacion na dump, cual sigur no tabata nada agradabel cu e situacion di e dump y nan a entrevista Anouk Balentina tambe. Algo cu sigur lo hala hopi atencion.
Tabata Secretario di Estado, drs. Alexandra van Huffelen cu un rato despues a yega cerca e manifestantenan di Aruban Warriors y a tuma e manifiesto over for di nan.
