Dia 2 di februari, esta diahuebs awo, tin un reunion cu e Regional Coordinator di Nacionnan Uni pa trata e tema manera cu a bisa anteriormente, p’e multi-country
sustainable development cooperation framework, hunto cu diferente pais den forma colaborativo pa traha riba e obhetivonan di desaroyo sostenibel.
Segun Milton Ponson, presidente di Rainbow Warriors Core Foundation, a splica cu dialuna a manda un carta pa Directie Economische Zaken Handel en industrie pa pidi aclaracion riba e echo cu, mirando cu e reunion tocante SDG lo bay ta cu un Regional Coordinator pa Nacionnan Uni, cu ta raporta directamente n’e secretario general, mester considera e reunion aki uno plenario, na nivel nacional y consecuentemente tur stakeholder, cu mester participa loke Nacionnan Uni ta stipula pa SDG pa “openly and inclusive community stakeholder participation in community decision making for sustainable development”, lagando ningun hende atras.
Parce cu gobierno no ta worry cu loke Nacionnan Uni mes ta stipula pa reunion plenario y p’e proceso di dialogo na un nivel di comunidad y pais yega na ehecuta e obhetivonan di desaroyo sostenibel.
Rainbow Warriors a pidi e carta y den e carta aki aclaracion riba e echo ta kico e reunion aki ta encera y pakico no tur hende ta invita.
Alabes a señala cu documento cu a bin hunto cu e carta aki, cu por cierto ta manda door di prome minister, na luga di e minister di desaroyo sostenibel, mr. Geoffrey Wever.
E fundacion ta cuestiona kico ta pasando. SDG’s a para bira un sorto di ‘one man show’ di prome minister, enbes di ta un proceso di e minister di desaroyo sostenibel hunto cu e Sustainable Development Goal Commission di Aruba cu por cierto ta carga y ta cay bao di ministerio di Asunto Economico, no asunto general.
No por conclui siendo cu na Aruba aworaki tin politica barata ta haci y hasta causando problema den coalicion comokiera cu e topico aki claramente ta toca minister di RAIZ y no minister di partido MEP.
A puntra den e carta aclaracion y alabes señala cu e proceso di dialogo nacional riba SDG desde 2019, ta inexistente na Aruba y a pidi Departamento Economico pa aclaria kico t’e meta di e reunion, pakico no tur hende ta invita y cu pa por fabor reinstitui e proceso pa dialogo nacional pa SDG, segun norma di nacionnan uni cu aki na Aruba te na 2019 tabata respeta y ehecuta.
Pero parce cu den e gobierno actual no kier cumpli cu ningun norma ni di nacionnan uni y ta haya masha normal cu nacionnan uni ta mal informa y a tuma nan haci kens. Si dia 2 di februari venidero e proceso no a bay segun norma di Nacionnan Uni, lo bay tin consecuencia tambe pa Hulanda, comokiera cu e asuntonan di SDG ta en principio asunto di reino y asunto exterior, como tal ta bay tin consecuencia p’e manera cu actualmente gobierno ta atende cu e tema aki na nivel nacional.
UN CALUROSO BONBINI
Famia real a yega Aruba y den e vuelo, birando pa baha na aeropuerto Reina Beatrix, nan por a mira cu nan propio wowo e candela enorme riba dump di Parkietenbos cu aworaki ta cera, pero sinembargo ta pega candela, segun presidente di Rainbow Warrios Core Foundation, Milton Ponson. “Esaki ta yama un caluroso bonbini na famia Real.”
