Diasabra anochi, Aruba Carnival Village tawata e centro di ambiente ora cu a scoge nos monarcanan di Caiso y Soca.
Un trayecto cu a cuminsa na november caminda cu tur e artistanan local a haya e oportunidad pa presenta nan cancion durante e pre-finalnan cu teni den diferente centro di bario riba nos isla. E evento di Caiso and Soca Monarch a culmina durante fin di siman, unda un total di 27 soca y 7 caiso a competi durante e anochi final.
Sosteniendo nos cultura y nos hendenan, Aruba Bank ta contento di por a forma parti di un evento cu ta sigui cultiva asina hopi creatividad bao di e compositor y areglistanan, unda musiconan y cantantenan ta presenta nan cancionnan di calidad halto cu tur nan entusiasmo n’e publico presente.
Un pabien ta bay pa Carl Roosberg ‘Galloway’ cu a logra retene su corona como Caiso Monarch King y Jair Dijkhoff ‘Casper’ como Soca Monarch King. Pero sigur un pabien na tur e finalista- y participantenan cu a logra di haci e evento aki uno magno.
