Den algun rato Aruba lo pasa di e aña bieu p’e aña nobo 2022. Awe tabatin celebracion tur rond di Aruba den cual pueblo henter por a gosa di cendemento di pagara, klapchi, scucha nos dushi dande y demas actividad festivo relaciona cu cambio di aña. Manera ta nos custumber di desea otro tur cos bon p’e aña binidero, nos prome minister tambe kier a manda su mensahe pa pueblo di Aruba.
Den su discurso el a expresa cu aña 2021 ta bay keda marca den historia como e aña cu mas reto y obstaculo a presenta pa Aruba, pero alabes ta marca un aña den cual a logra alcansa hopi logro. Mas o menos 100 dia pasa, Aruba a conoce su gobierno nobo, Gabinete Wever Croes II. Pa Prome Minister mr. Evelyn Wever-Croes ta un honor pa bolbe sirbi e pueblo di Aruba un biaha mas como prome minister.
Den cuadro di tur situacion dificil y reto presenta, tanto gobierno como e sector priva a sa di dun acara pa asina recupera nos economia y crea progreso como tambe bienestar pa un y tur. El a expresa, referiendo na Eleanor Roosevelt, cu semper mester acepta tur loke bida presenta y cu locual ta importante ta pa ofrece lo miho di bo mes.
El a manda un palabra di gradicimento na tur trahado di cuido cu a sa di enfrenta tur reto cu e pandemia a presenta, cu un curason di amor y dedicacion. Tambe a expresa su gratitud pa tur maestro y alumno cu a sa di cuida nan mes den e situacion dificil di e pandemia. Tambe a gradici e sector publico y priva cu mester a enfrenta reto financiero, familiar y social, pero a pesar di esaki a haci nan maximo esfuerso pa recuperacion di nos pais. Tambe el gradici tur boluntario cu a traha ora extra pa enfrenta esaki tambe y yuda Aruba bay pa dilanti.
Por ultimo el a gradici Aruba su comunidad completo den nomber di gobierno. A referi aki na un y tur cu a duna di nan banda pa Aruba recupera. Asina el a termina deseando un feliz aña 2022 y a pidi pa Dios bendiciona cada ciudadano di nos pais.
