Diabierna mainta, e Gobierno di Aruba a anuncia un acuerdo cu Hulanda riba e Rijkswet, un acuerdo hibrido cu a lanta interes generalisa. Miembro di fraccion di MEP, parlamentario Marco Berlis, a expresa e necesidad di analisa detayadamente e contenido di e acuerdo. El a indica cu, mirando e oposicion anterior di RAft, un acuerdo hibrido por ofrece un alternativa beneficioso, semper y cuando inclui cierto punto clave.
Berlis a responde na un comentario riba si MEP a cambia su postura n’e acuerdo aki. El a enfatisa e importancia di aspecto manera e ‘exitclausule’ y e inclusion di e demandanan anterior di e partido den e acuerdo.
Ora cu a puntr’e, si tin posibel cambio positivo, e lo sostene e Rijkswet, Berlis a señala cu prome e lo warda pa conoce e detayenan prome cu e duna un opinion.
Riba e firmesa di e fraccion di MEP den su posicion, Berlis a afirma cu nan a mantene un postura firme. Nan a logra mantene cierto aspecto riba mesa di negociacion y lo sigui lucha pa obtene e miho acuerdo posibel pa Aruba.
Den cuadro cu e idea cu e votacion di parti di MEP, lo ta honra e legado di Betico Croes y evita perdida di e autonomia, Berlis a enfatisa e importancia di e exitclausule y e responsabilidad di e futuro gobiernonan.
