Awe mainta, gobierno di Aruba, bao di Gabinete Wever-Croes II, a anuncia den un conferencia di prensa, un acuerdo cu nan a alcansa cu Hulanda pa firma un rijkswet nobo. E acuerdo aki cu anteriormente tabata obheto di oposicion di parti di e fraccion geel den Parlamento, a genera sorpresa. Sinembargo e gobierno lidera pa e coalision MEP-RAIZ, a declara cu nan a yega na un consenso y cu a logra un reduccion den e interes di 6.9% pa 5.1%.
A yama Parlamentario independiente, mr. Gerlien Croes, tambe pa participa den e reunion aki na ultimo momento. El a expresa sorpresa p’e evolucion rapido di e proceso y e disposicion di e prome minister y su partido pa compromete, a pesar di e añanan di a nenga y lucha na defensa di e autonomia di Aruba. Ta cuestiona awo kende lo beneficia realmente di e acuerdo aki. Ta spera cu lo proporciona detaye riba e beneficionan potencial, incluyendo e reduccion menciona di interes.
Croes a expresa su curiosidad pa conoce e declaracion di e Prome Minister den Parlamento di Aruba, como tambe e intensionnan tras di e Rijkswet nobo aki. El a indica di e importancia cu e beneficionan cay riba e pueblo di Aruba y a expresa su speransa pa destina parti di e fondonan pa mehoracion di e infrastructura electrico, mirando e instabilidad actual den e sector aki.
Croes: ” Beneficio pa ken? Esey t’e pregunta aworaki. Rijkswet mester bin ainda pa nos wak e. Awe nos ta bay scucha loke e ta bay informa nos. Pero segun su retorica cu mi a scucha awe mainta, ta cu ta bay tin un reduccion grandi pa loke ta e interes. Na beneficio di ken aworaki e ta bay? Entre otro, tempo cu tabata den discusion pa cu e rijkswet, varios argumento a wordo treci dilanti.
Su persona mes tabata cuestiona e echo cu ora si e posibilidad ta existi cu ta haya un reduccio di interes mes, si esaki, e reduccion cu ta haya tin cu bay wordo uza pa baha e debe so, of si ta bay haya oportunidad pa inverti tambe e placa aki. Y esey e tempo ey e rijkswet no tabata duna e oportunidad p’e.”
Ora cu a puntr’e riba su posicion, Croes a reitera su desacuerdo cu e version original di e Rijkswet y a expresa preocupacion p’e posibel uzo exclusivo di e fondonan cu ta bin di e reduccion di e debe. A mustra interesa pa conoce mas detaye riba con lo uza e fondonan aki pa inverti na Aruba.
Concluyendo, ta papiando di un enfoke hibrido den e Rijkswet nobo aki. Croes a destaca e necesidad di garantisa cu Aruba no perde su autonomia den e proceso aki.
