Gobierno di Aruba a duna di conoce di un acuerdo cu nan a cera cu Hulanda riba un rijkswet nobo durante un conferencia di prensa diabierna mainta, presenta pa Prome Minister Evelyn Wever-Croes. E noticia aki a genera un amplio interes y a provoca reaccion inmediato di parti di e miembronan di Parlamento.
Ta cuestiona e anuncio
drs. Marisol Tromp, lider di fraccion di MAS, a expresa su skepticismo riba e anuncio y a ilustra riba su berdadero impacto. Tromp a señala cu e documento presenta ta sugeri un inicio di e trabao di e Rijkswet nobo, pa mei 2025, pero a cuestiona e relevacia y e balor di e declaracion aki den e contexto actual.
Tromp a enfatisa riba e negativa cu e Minister di Finansa a haya ora cu el a pidi un prestamo di 160 miyon dollar pa cubri e pagonan, incluyendo salario di e empleadonan publico, loke ta trece preocupacion serio riba e situacion financiero di Aruba. El a indica cu gobierno parce ta ignorando su responsabilidadnan financiero y ta purbando di acepta e Rijkswet como un solucio facil pa nan problema.
Critica riba e falta di transparencia y responsabilidad
Lider di fraccion di MAS a critica tambe e falta di transparencia y responsabilidad di gobierno, señalando cu ainda no a rindi cuenta riba e finansa di e pais desde 2018. Fuera di esey, el a cuestiona e coherencia di e gobierno, cu inicialmente a rechasa e idea di un Rijkswet pero awo parce ta dispuesto pa acept’e.
Incertidumbre riba futuro
Tromp a expresa su preocupacion riba e incertidumbre futuro, specialmente si tin un cambio den gobierno. E tin miedo cu un gobierno Hulandes nobo por impone condicion mas estricto pa Aruba, loke por complia ainda mas e situacion financiero di e pais.
Reflexion final
Lider di fracicon di MAS a indica e necesidad di atende seriamente e problemanan financiero di Aruba y di proporciona un solucion realista y sostenibel. El a conclui cu, gobierno mester enfoca pa enfrenta e retonan real cu e pueblo di Aruba ta pasando aden.
