Den e weekend venidero, Aruba Wielerbond lo tin dos dia di ciclismo den e area di Malmok y vecindario. Nan a duna e evento e nomber di Warm-Up 2 Stage Race cu lo ta diasabra y diadomingo awor. E federacion di ciclismo lo tene dos careda chikito y dos grandi den forma di circuito na Malmok/Bakval. Mester bisa cu ariba e prome dia, esta e diasabra, lo tin un time trail di 6km den e categoria mayor, mientras cu diadomingo e careda lo ta riba un distancia di 12km pa esunnan hoben y 84 km pa esunnan mayor. Remarcabel ta cu dia 18 di Maart e federacion di ciclismo lo ta organisando un careda masha grandi mes riba ruta cu un recorido basta largo mientras cu e evento di diasabra y diadomingo awor ta net un bon preparacion pa drenta den e rutina di ruta.
Mas cu claro un suplica ta bay na tur automobilista cu lo usa nos careteranan pa porfabor tene cuenta cu riba e dos dianan menciona den e area di Malmok y Bakval lo bay ta uno hopi ocupa cu atletanan riba bicicleta como tambe mirones bandi caminda ta apoya nos ciclistanan.
Un danki sigur na Lotto, e Loteria di Aruba pa medio di Stichting Sportsubsidie Aruba cu a subsidia e eventonan di Aruba Wielerbond pa loke ta e temporada di cilcismo 2018.
Cumprando weganan di Lotto, e Loteria di Aruba manera Catochi, 1-Off, Big 4, Zodiac, Wega di Number Korsou, Lotto Di Dia, Lotto 5, Mini Mega cu su Mega Plus y e weganan di Raspa Y Gana, bo ta contribui na deporte ribanos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e Stichting Sportsubsidie Aruba.
