Ta parce cu e ambiente den Dr. Horacio E. Oduber Hospitaal ta sigui dificil y conflictivo. Awe merdia 2:00pm lo mester a tuma luga e prome reunion di dialogo entre Mediado di Gobierno, Hunta di Supervision di Hospital y sindicato ABV, pero e reunion ta cancela. Esaki debi cu Anselmo Pontilius a hay’e stroba y a pidi pa “reschedule” e reunion pa 5:00pm en bes di 2:00pm, locual e sindicato a nenga rotundamente. Parce cu na Hospital falta hopi trahado y si e sindicalistanan cambia e orario di reunion, nan lo stroba operacion den Hospital. No a fiha otro fecha y orario ainda pa sigui e proceso di dialogo pa paz den Hospital
Mediado di Gobierno, Anselmo Pontilius, a pasa diahuebs, diabierna y diasabra na mesa cu dirigentenan di e sindicato Arubaanse Bond van Werknemers in Verplegende Instellingen (ABV), cu Hunta di Supervision di Dr. Horacio E. Oduber Hospitaal y cu gerencia di Hospital mes, encabesa pa Ezzard Cilié. A scucha e partidonan, a delibera bastante amplio cu na, ya cu den situacionnan asina aki, dificilmente Mediado di Gobierno lo por presenta un alternativa otro cu convoca e partidonan na un dialogo pa analisa locual a conduci pa e sindicatonan y su miembronan pa tuma un postura asina fuerte. Pontilius ta conclui cu e sindicato ABV ta sinti cu a intimida nan, particularmente e Presidente y su Vice-presidente. Mediado di Gobierno ta haya cu si esaki ta berdad, anto e ta un asunto hopi serio!
Pero, mester menciona cu cada banda ta duna nan splicacion y asina a acumula hopi punto cu awor ta riba mesa, cu ta bale la pena dialoga y haci tur intento pa yega na un acuerdo y na mes momento palabra cu otro con lo preveni pa yega na scenarionan asina. Ta conoci cu cada partido tin nan rol diario den operacion di Hospital. E sindicato riba su mes ta representa un porcentahe grandi di e trahadonan, nan ta memey di negociacion pa un contracto colectivo (CAO) nobo y net awor ta presenta e situacion aki. Nan a bisa Mediado di Gobierno di ta lamenta cu net na final di negociacion di e CAO, cu ta core cu e Director Financiero di Hospital, mientras cu di otro banda e Director di Cuido ta manda menasa e Presidente y Vice-presidente di e sindicato cu retiro inmediato. E tipo di situacionnan asina sin duda no ta yuda pa drecha e relacion entre sindicato y gerencia di Hospital.
Mediado di Gobierno Anselmo Pontilius a logra convence e tres partidonan, esta ABV, Raad van Toezicht y Raad van Bestuur, pa start e proceso di dialogo mesora. Esey lo mester a inicia awe dialuna pa 2:00pm cu un prome reunion entre e sindicato ABV y Hunta di Supervision di Hospital, encabesa pa Presidente Gino Goeloe. Despues lo sigui cu gerencia y asina hunto mira con lo por yega na un documento den cual ta delinea con ta preveni escalacion di un mal ambiente den e organisacion.
Claro cu e menasa di welga t’ey, pero Mediado di Gobierno ta confia cu partidonan lo sali for di e impasse aki na mesa mes. Ta bisto cu e sindicato y gerencia no a pega cu otro a base di condicionnan di trabou, manera aumento di salario of beneficionan secundario, sino mas bien a pega den e relacion cu mester existi entre Hunta di Supervision, gerencia y sindicato. Anselmo Pontilius a corda tur hende cu ta un Hospital nos tin y esey no kiermen cu por tin un diferencia di opinion entre gerencia y sindicato, pero cu e ta yega na un extremo cu esun ta menasa e otro y te pa sindicato exigi cabes di gerencia di Hospital, ta un asunto serio caba cu no mag ripiti mas.
Te ainda no a fiha un ora pa e siguiente reunion awor entre sindicato y Hunta di Supervision di Dr. Horacio E. Oduber Hospitaal. Tur cos ta mustra cu e reunion lo continua diamars, ora cu Mediado por, ora cu ABV por y ora cu e miembronan di Hunta di Supervision di Hospital ta disponibel pa sinta y dialoga.