Ayera 1 di juli tres parlamentario di e fraccion di AVP a manda un carta pa Presidente di Parlamento, Edgard Vrolijk, den cual ta exigi basa riba riba reglamento, pa Minister Presidente Evelyn Wever-Croes presenta den reunion publico y duna splicacion tocante investigacion haci na Arubahuis y e retiro repentino di e Minister Plenipotenciario, Guillfred Besaril. E carta aki ta bin despues cu Vrolijk a informa e parlamentarionan cu minister-president a nenga nan peticion.
Den un carta cu fecha di 24 di juni, Vrolijk a pone adhunto e reaccion di Premier Wever-Croes riba nan peticion pa un Reunion Publico. Basa riba esey, parlamentario mr. Gerlien Croes, ing. Mike de Meza y mr. dr. Ryçond Santos do Nascimento ta recorda y ta keda pendiente cu Parlamento mester yama dicho reunion den termino di 30 dia contando desde 14 di juni 2022 cu e peticion a sali, segun articulo 23, lid 1 no. lid 3 di Reglamento di Ordo di Parlamento di Aruba. E parlamentarionan ta desea di haya un confirmacion di fecha y ora di e reunion por escrito lo mas pronto posibel.
Tambe e parlamentarionan ta recorda cu segun artikel III.18 di Staatsregeling, un solicitud door di un parlamentario na un minister pa atende un reunion publico no ta algo opcional. Di mesun forma ta indica na Presidente di Parlamento cu e no tin e capacidad pa nenga di yama dicho reunion publico.
Pues di e manera aki ta keda pendiente di ki lo ta e proximo paso di Vrolijk, como tambe di Prome Minister Wever-Croes pa cu e peticion di e representantenan di pueblo cu ta busca pa sa mas di e abnormalidadnan, segun e mandatario mes a admiti, cu ta sosodiendo na Arubahuis.
