Zyron Todd den Corte a reclama cu ningun dia a mustr’e video di tiramento banda di Blue Moon pa cual e ta deteni y a insisti cu si e no a los tiro, nan lo a tira riba dje, pasobra e otro homber tabatin un arma den su poder.
Fiscal a haya cu e ta culpabel di intento di asesinato pa cual el a exigi pa dun’e un castigo di seis aña.
E echo aki a tuma luga riba Dia di Betico den area di Blue Moon, unda cu a surgi intercambio di palabra / reclamo entre e acusado aki di 24 aña y otro homber.
Geboei na man y pia a trece e acusado den sala di Corte. A splic’e cu e acusacion contra dje ta intento di asesinato, subsidiariamente intento maltrato pisa; e di dos acusacion ta cu riba e mesun fecha el a los tiro riba un cas den Pindastraat. Fiscal a bisa cu e motibo cu e ta pone e acusacion aki como intento di asesinato ta pasobra si tabatin hende den e cas, e bala lo por a alcansa nan. Y tambe a acus’e di posesion di arma di candela.
A cuminsa trata e parti di Blue Moon prome. E tabata den e area ey y por a mira esaki riba e video presenta den Corte. E mes tabata mustra fiscal unda cu e tabata para, con el a cana bay cerca un conoci di dje pa puntr’e algo y eynan ta caminda e homber na banda a cuminsa cu tiramento di palabra y ta unda e problema a cuminsa.
