Habitantenan di capital di Venezuela, esta Caracas, a sinti temblornan fuerte awe despues di 5:00am. Segun Fundacion Venezolano di Investigacionnan Sismologico, e temblor tabata di magnitud 4,9.
E epicentro, sigui pa varios replica cu magnitudnan entre 3.8 y 4.8 a ubica 9,4 kilometer di profundidad y 12 kilometer noordwest di Valencia, den e estado Carabobo.
E servicionan geologico di otro paisnan a eleva potencia di e temblor. Servicio Geologico Colombiano a informa riba un evento sismico di magnitud 6,1 mientras Servicio Geologico di Merca, a ubik’e na 5,5 y localisa su foco mas of menos 17 kilometer for di Valencia.
Di su parti, e Minister di interior di Venezuela, Nestor Luis Reverol, a desmenti e reporte di e otro paisnan riba e sismo, afirmando cu na Venezuela tin “suficiente censor den e centro di e pais” cu ta permiti determina cu e magnitud raporta pa e Fundacion Venezolano di Investigacionnan Sismologico ta esun corecto.
Ademas di e Region Capital y Carabobo, a sinti e temblornan den e estadonan di Aragua, Miranda y Vargas. Usuario di e rednan social a reporta movimento telurico for di ciudadnan manera Puerto Cabello, Maracay, El Limon, Los Teques, San Antonio de los Altos, San Joaquin, Ocumare del Tuy, Guarenas, Barquisimeto, Guatire y e poblacion di Naguanagua. Hopi Venezolano a sali riba caya for di nan cas.
For di e municipio di San Diego (Carabobo), situa mas of menos seis kilometer di e epicentro di e temblor, ya a yega imagennan cu ta mustra e dañonan material.
